Column Tonko Ufkes, column, goed lek

Gepubliceerd op 23 september 2015 | door Webloug

0

‘Spiet’ column van Tonko Ufkes

Spiet

Laangzoam wor k wat wakker en vernem dan twee beste aarms stief om me toe; wij leggen beiden op e zied en de oadem van mien vraauw vuul k zaacht ien e nek, heur lichoam drukt tegen mien rug. Veurzichteg perbeer k te draaien mor t lukt niet recht en k val host weer ien sloap.
‘Oh, doe bist het niet’ bromt n stem achter me, ‘ik ben leuf ik n verkeerde tent ienkropen. Het spiet me.’ De vraauw wringt heur lös, schoeft noar achtern en verdwient.
‘Hm, t spiet mij ok,’ ontsnapt me. Eefkes blief ik zunder te bewegen op t luchtberre leggen en net as t me zo’n beetje duudlek wordt wat of der gebeurd is, ploft mien vraauw achter me.
‘Doe,’ begunt ze meteen, ‘doe, ik mos noar de wc, proatte doar hiel even met n aander kampeerster mor ben bliekboar noatied met mien sloaperege kop n verkeerde tent binnengoan; al die ienrichtte tenten lieken ok zo op nkander! Eerst toen k goed en wel lag, kreeg ik t deur. Vanzulf zee k geliek: “t spiet me” en k vloog der uut.’
Ik verroer me niet, ik wacht hoe t òflopt.
‘Wiest wat die zwienhond nog tegen me zee?!’ Heur stem is hoog, mor ze lijt al weer vertraauwd tegen mien rug.
‘Hm,’ en ik hol gelukkeg mien lachen ien, ‘hm, ik kin t host wel roaden.’

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

2 × vier =

Terug naar boven ↑
  • Literatuur activiteiten

    Geen nieuwe activiteiten