Muziek

Gepubliceerd op 16 december 2014 | door Webloug

0

Speulliest Twij Deuntjes (week 51)

Grunnen zingt, mit n lutje oljoarsmiemeroatsie. Vieftien joar Twij Deuntjes veur ain Cent! Radio Noord bestaait sikkom viefenzeuventeg joar en is sund d’oprichten al n springplaanke west veur Grunnegstoalege meziek. Vanòf t aanbegun tot nou is der din ook in t Noordarchief n grode schat aan meziek.

Bie t soamenstellen van ons doaglieks pergram kinnen Rolf Schreuder en ik doar goie sier mit moaken en as deurgevers van t verhoal, dat oeit aargenswoar begonnen is, ook n stee in de geschiedenis geven. In Twij Deuntjes loaten wie din ook geregeld hail geern zukse opnoames heuren en din aaltied mit de gedachte dat zukswat uut de tied dij achter ons ligt zo studdie aan tot t immaterieel aarfgoud van Grunnen heurd. Kört zegd, aal dij meziek mit mekoar is min of meer n fundamint van onze Grunneger Streektoalmeziek van nou. Tussen de klassiekers ‘Peerd van Ome Loeks’, ‘Ain Boer wol noar zien noaber tou’, ‘Moeke der staait n vrijer veur de deur’ dij heur oorsprong in de 18de en 19de aiw hebben en laidjes van bievubbeld Lianne Abeln, Jan Henk de Groot, Alex Vissering, Marlene Bakker, Harry Niehof, Bert Hadders, Swinder en nog veul meer van nou, is op t eerste gezicht vanzulf meschain n hemelsbraid verschil. De muzikanten van tegenswoardeg moaken gebruuk van d’haile baandbredte aan meziekstijlen dij bie dizz’ tied heuren. Mor in d’inhold blift men, en dat mout je din wel roem zain, traauw aan t Grunneger Laandschop in aal zien sezoenen, traauw aan geleuf, hoop, laifde en de dood en traauw aan Stad en Ommelaand, en goa zo mor even wieder. Doarbie mout wel zegd worden dat de muzikant-laidjesschriever van nou, mennegmoal t experiment nait uut de weg gaait. Benoam t theoater lonkt noar n aander vörm van spektoakel en doar wordt vandoag de dag ook haile goud deur streektoalmuzikanten op inspeuld. Aal mit aal is der nou echt sproake van n hail dynoamische meziekbewegen in Grunnen. t Is bie de laidjesmoakers nait aalmoal: ‘veur de kermis is t laggen gieren brullen en hou maler hou mooier’, der is ook roemte en n hang noar wat eernsachtege zoaken in tekst en laid. t Pebliek, dij, gezain de veule optredens, doar ook aal meer oog en oor veur het, pakt zukswat mor aal te geern op.

Bekiek speulliest HIER.

Tags: , ,



Reacties zijn gesloten

Terug naar boven ↑
  • Muziek activiteiten

    Geen nieuwe activiteiten