Muziek

Gepubliceerd op 1 december 2014 | door Webloug

0

Speulliest Twij Deuntjes (week 49)

Der klimt wel es n loze gaaie mit de beste bedoulen in n appelboom en perbaaiert din n plukte appel aan n takke weerom te hangen. Mor d’appel geft gain oazem en gruit nait meer aan. Dizze appel is gain bale of dail van n spultje. Hier bruuk we t as n symbool veur aankomst, vertrek en vergankelkhaid.

t Parredies het zo zien aigen invullens as t gaait om t herstellen van n weeffout. Wie weven en knuppen, elk op zien menaaier n tapijt veur t leven. De Keulse zanger Wolfgang Niedecken dij we ook kinnen as frontman van BAP is de leste tied bie t pad mit zien muzikoal sprookje zunder stekkers. Hai kikt in ‘Noh all dänne Johre’ weerom op zien lange carriere as zanger in t Köölsch. Dizze weke stoan we ook eefkes stille bie t allerleste laidje van Cornelis Vreeswijk. Zien indringende saluut ‘Ann Kathrin Farval’ het e kört veur zien verschaaiden mit dood in d’haals nog inzongen en het zulf t verschienen doarvan nait meer beleven kìnd.

De Noord-Grunneger band Tunebone mit laidjesschriever-zanger Jan Sleumer slut hier mit ‘Niks te verlaizen’ inholdelk noadloos op aan. In Swinder heur ‘Wotter noar zee’ gaait t nog onbekommerd tou en alles wat votgaait komt aaltied as wotter weerom noar t olde vertraauwde stee. De veulziedege Ostfraize zanger Hannes Flesner het bie onze oosterburen min of meer dezulfde stoatus as bie ons Ede Staal. Zien haile levenswaark as Ostfraize laidjes man is te vinden op n dubbel-cd. Wat ’t Het nog nooit zo donker west’ is bie ons min of meer cult, t laid ‘Bottermelktango’ van Hannes is dat veur de Ostfraizen. Wieders hevve dizze weke as uutsmieter van onze uutzendens n primeur mit d’aanstekelke instrumentoale Keltische meziek van de Galicische virtuoos Carloz Nunez.

Speulliest is HIER te bekieken.

Tags: , ,



Reacties zijn gesloten

Terug naar boven ↑
  • Muziek activiteiten

    Geen nieuwe activiteiten