Algemeen

Gepubliceerd op 11 november 2014 | door Webloug

0

Speulliest Twij Deuntjes week 46

Woar binnen dij laidjes, dij nait aanpaast binnen en ale tieden deurstoan zellen. Goie laidjes dij ons wakker moaken of holden en ons bie zetten tot alerdaipste gedachten zetten. Kin meziek de wereld veraandern of blift t mor bie n utopische zinsverduustern.
As laidjes as vergeetmienaitjes niks beduden, woarom wuir protestzanger Victor Jara, toudestieds in t Chili van Pinochet deur zien haandlangers om haals brocht? Lieven Tavernier d’laidjeskirrel uut Gent het mit zien noagelnije spaigelploat ‘Wintergras’ veur de zoveulste moal weer n pronkjewail aan deurwrochte laidkunst ofleverd. t Gaait bie hom noar mien mainen aalgedureg om t knoagend gevuil noar n onvervuld verlangen doar e noa aal dij achterliggende joaren noar longert. Dij aine raaize noar Toscane dij hom mor nait uut de kop gaait. Bie t eerste heuren klinkt t aalmoal zo ainvoldeg en bie zetten beschaauwend, mor in elk laid komt din dat aine beeld of n inpakte zin dij t der inainen tou dut. Ina Müller sloet hier vot op aan mit heur beschaauwen in ‘Das war dein Lied gewesen’. Sean Keane en Friends komt nait lös van zien geboortestee ‘Galway’. Pé Daalemmer & Rooie Rinus longern al sund joar en dag noa heur zoveulste ofschaaid in noavolgen van dr. Hook op de Rolling Stone as alternatief noar n stee op de veurploade van t grootsteedse bokkebloadje ‘De Loeks’. Arno Adams lucht zien haartzeer in n ‘Sintmaarten’s Bluez’. De Limbörgse Chansonnier Bert van den Bergh bezingt de moane en de zun in zien ‘Luna en Sol’. Krödde Meziek slut hier noadloos op aan mit doe bist mien ‘zunneschien’. Knoalster Tammo schreef mie: Dizze weke was t weer zo wied. Weer een beven. Ik bin kwoad, heul kwoad. Ik heb der mor ain laid over schreven. Mien eerste protestsong’. Wie hebben zien eerliekse protestlaid, dat menneg Grunneger moud geft, mit de titel ‘Zelstoe aaltied blieven doalen’ over d’eerdbevens in Stad en Ommelaand van Tammo Tammingoa, op wieze van Ede Staal mor vot in t pergram nomen.

Speulliest is HIER te bekieken.

Tags: , ,



Reacties zijn gesloten

Terug naar boven ↑
  • Activiteiten