Muziek

Gepubliceerd op 26 oktober 2014 | door Webloug

0

Speulliest Twij Deuntjes (week 44)

Grunneger meziek is mor al te voak n manluzoak, mor Grunneger vraauwlu loaten zuk leste tied gelokkeg ook aal meer mit nije vertolkens heuren. Irene Wilkens & Sikkom Kult het dizze weke n hail aigen versie van Bert Hadders zien ‘As Julio gaait zingen’, woarin de Madrileense zanger Iglesias en t uutzichtloze leven rondom n gokkaaste n rol speult, op single uutbrocht.

In Noordbrouk hebben ze d’oflopen moanden ook hail wat gouds omhaands had. Ze hebben doar mit verainde kracht n machteg mooie spaigelploat ‘Aanspould’ mit Roel van der Zee en Eddie Loonstra ontwikkeld. n Groot dail van de Broukster gemainschop, woaronder kinder van de legere schoul, het doar mit hulp van lu van t Noordpoolorkest o.l.v. Reinout Douma aan mitwaarkt. d’Aanlaaiden van ‘Aanspould’ was de opening van n nije gemainschopshuus. In Twij deuntjes loaten we doarvan dizz’ weke verschaaiden stukken heuren. t Nije aalbom van de Bremer band Element of Crime mit de tuddel ‘Lieblingsfarben un Tiere’ het bie onze oosternoabers n beste stain in t bred en ook al hail wat gouds in wege brocht. De zanger/schriever Sven Regener maarkt op dat e mor al te voak aine omsunst opbelt, omdat aal meer lu heur mobieltje nait meer bruken en dat in dizze tieden n vaste tillefoon mit n zwakstroomsignoaloverdracht n zinloos ding aan t worden is.

Noast d’eerdbevens dij menneg muzikant inspireren tot n protestsong is der nou ook n tegenbewegen over de komst van windmeulens rondom Maiden. De Maimer laidjesman Bé Schmaal en producent Alex Staal hebben as steun doarveur n specioal protestlaid schreven. Ook aandacht veur t veule haartzeer in ‘mien vraauw het mie verloaten’ in de blues van Hans van Lier. Ook goan we zunder om te kieken op pad mit de Broabander J.W. Roy. Mit de tiedenloop van Jan Cornelius uut Jemgum aan de Ems goan we richten Amsterdam, want veur jonge lu in Ostfraislaand ..fangt dor t leven an..
Elke waarkdag van 18:00-19:00 uur op Radio Noord. Bekiek speulliest HIER.

Tags: , ,



Reacties zijn gesloten

Terug naar boven ↑
  • Muziek activiteiten

    Geen nieuwe activiteiten