Muziek

Gepubliceerd op 21 oktober 2014 | door Webloug

0

Speulliest Twij Deuntjes (week 43)

Dizze weke aandacht veur de nije single ‘Heufd as helm’ van Marlene Bakker en ook n noagelnij laidje van de Zelnger Hans Ten Have ’t Laand van Haans’ komt veurbie.

De Zweedse Rokoko componist en laidjesmoaker Carl Michael Bellmann blift ook dizze aiw inspireren. De Duutse Liedermacher Hannes Wader, Reinhard Mey en Klaus Hoffman vertolken veur t eerst mit heur drijent dit slim aanstekelk en ondeugend waark, deurspekt mit draank, laifde en dood, op n hail aigen wieze. Ook n nije generoatsie Ierse en Schotse muzikanten Griogair: n Gaelic laidjesman, Lìadan: jentege Ierse wichter mit n missie, Beoga: nij Keltisch vuurwaark, kommen in Twij Deuntjes veur t voutlicht.

Veur Woensdagoavend gaait bie ons alles op stoom, diezel en t elektries. Over t volle leven tussen de bielzen en rails op droad of deur de ether. Tussen aankomst en ofschaaid gaait n hail leven schoel, zo gaait t ja voak mit ‘Dommee vief veur ain gaait leste traain’ van Woarom Nait. Traain dendert aal mor wieder mit ‘Leste traain noar Knoal’ van Bert Hadders en de Nozems. De traain rolt wieder al tjoekend mit Daniel Lohues Drenthe deur. De Comets Skiffle groep nostalgeert van Schaanze noar Troapel mit olde Grait sukkeldaauwend al poestend en stènend in de boan. Piet Buist en Geert Zijlstra nemen via t Westerketaaier de leste traain noar Visvliet en kommen nait weerom. Onderwegens kwam dou ducht mie traainconducteur Jan Veldman in zien ainmansainzoamhaid der ook over tou. t Leven bestaait bie hom uut n gat in t traainkoartje mit n inkelde raais noar Naargenshoezen. De Zweedse troebadoer Sven Bertil Taube uut t kolde duustere noorden dagdreumt in ‘Fragancia’ over n waarme stee onder appelsienebomen in Wiedweggiestan. Erik Harteveld gaait der vot achterheer mit ons traain hen Grol. Westkant Stad mit Vera Sutman wachten op n traain dij nog kommen mout en dij aargenswoar deur haarstbloaden op t iesder stoekt. Ede Staal zien ‘Twijde Perron’ sprekt boukdelen over t verloren wezen in t gemoud en haartzeerte van t ofschaaid nemen en dat speult zuk allemoal òf tussen twinteg en tiene veur negen. Zoveul joaren zo kört t leven en wie mor elke nacht wachten op de allerleste traain dij oeit kommen zel.

Elke waarkdag van 18:00-19:00 uur. Kiek HIER veur de speuliest.

Tags: , ,



Reacties zijn gesloten

Terug naar boven ↑
  • Muziek activiteiten

    Geen nieuwe activiteiten