Muziek

Gepubliceerd op 24 maart 2014 | door Webloug

0

Speulliest ‘Twij Deuntjes’ week 13 mit Jan Siebo Uffen

Deurdat dizze weke bie Noord hailemoal in taiken van de Grunneger toal staait hebben we ale oavends n sjort storie, schreven en verteld deur de schriever, dichter, rasverteller en wat nait aal, Jan Siebo Uffen, in t pergram.

Veur de Grunneger meziekwereld is Jan Siebo al sund joar en dag gain onbekìnde. Weeklieks binnen der deurdeweeks op Radio Noord alerhaande uutvoerens van zien laidteksten deur n keur aan artiesten te heuren. Laidjezangers zoas Arnold Veeman, Wia Buze, Rika Dijkstra moaken dankboar gebruuk van zien toaleg talent as tekstschriever.

Jan Siebo Uffen kwam in 1942 in tied en gruide op in Noordloaren mor leerde van zien ollu de toal van t Oldambt. Zulf nuimt e t ‘Oostelk Grunnegs’ Zien schrieverij in t Grunnegers begon aargenswoar in de wuilege joaren zesteg. Hai publiceerde dou al zoas dat heurde onder verschaaiden schoelnoamen in t beruchte satirisch tiedschrift ‘Twijspaalk’(1966) en in t ‘Maandblad Groningen’ mit verhoalen en gedichten en loater in ‘Krödde’ en in ‘Toal en Taiken’ en mit columns en verhoalen veur t Nijsblad, Winschoter Kraande en ook veur de RONO loater Radio Noord.

Jan Siebo het in d’ oflopen viefteg joar een groot oeuvre opbaauwd en is aiglieks van ale maarkten thuus en krejatief op alerhaande menaaiern inzetboar. Noast zien oorspronkelk waark is e noamelk ook n haile goie omtoaler van aandermans waark. Zo het e bievubbeld meroakels mooie vertoalens moakt van de volledege Winterraaize van Schubert, Schumanns Dichterliebe en Grieg’s Peer Gynt. Over zien hail aigen toalgebruuk is der in d’òflopen joaren hail wat zegd.

De dichter Peter Visser het dat gegeven oeit n moal hail roak typeerd: “dou ik t verhoal ‘Lente nu’ van hom onder ogen kreeg ien t Moandblad Grunnen van november 1961, n verhoal dat e schreef dou e achttien joar was, dou besefte ik wat, doar wie nait aal doag bie stilstoan, dat Jan Siebo aal drij decennioa mitdraait (nou al vieve). Woorden dij ons nou biezunder in de oren klinken, wazzen veur dareg joar gemaingoud. Siebo het heur haitied aal bruukt. Olde toal paast hom sekuur, van hai is doar nooit van ofstapt, t heurt bie hom. Veur de rest: opbaauw van zien verhoalen, ienhold dervan en veuraal vrizze toal om olde tou, is e nait achterbleven, Wat old was komt bie hom ien n nij licht te stoan?” (uut: Peter Visser, Laiw op n dampoal)

Twij Deuntkes veur Ain Cent is elke waarkdag te heuren op Radio Noord van 18:00- 19:00 uur. Speulliest is HIER te bekieken.

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , ,



Reacties zijn gesloten

Terug naar boven ↑
  • Muziek activiteiten

    Geen nieuwe activiteiten