Column Jan de Jong, column

Gepubliceerd op 27 april 2015 | door Webloug

0

‘Snibbechien’ column van Jan de Jong

Snibbechien

Liesters zingen en ploat van holtdoef stoekt aal bie t zulfde deuntje en begunt din vernijs.
n Winterkoninkje dut zien best.
Ik kiek oet t sloapkoamerglaas. Zun is al over raand kropen. n Blaauwe lucht spant hom over wereld.
Wat zel doar ien t verbaarg achter weden.
Ik schoef gerdienen lös. Loat elk doar zien aigen mor van denken.
Eerst n begun van dag dij nait stukkend kin.

Noa kovvie wil k ien stad t veujoar pruiven. Gewoon. Eefkes over maart. Minsen kieken. En vanzulf of zai nog dooie vizzen mit n siepeltje verkopen.

n Kört, oareg steveg manspersoon, gezet zeg mor, staait mit kop ien zun, ain haand n buusdouk en aander n tippuutje doar n worst hom aan glopt. n Haalve worst dij t filioal doar wie veur stoan noam geft en kop boven wotter dut holden.

Pet gaait wat daiper ien ogen. Zien oetkiek zel nait misstoan bie n koolmonoxideslachtoffer. Hai vrift hom snoet schoon en hapt. Ogen goan der eefkes bie dicht. Din kikt e noar zien puutje en hapt nog ais. Lopt wat bie kin deel en kommen duustere plekken op zien zummerjaske. Buusdouk mout ter bie kommen. Ogen glinstern en hai kikt ais om hom tou. Wat n levent, wat n genot. Dat ie dit mitmoaken maggen. Hai hapt nog ais.
‘Lekker man.’ Hai nikt noar mie en noar t puutje. ‘Mag k nait hebben, mor aal week koop k mie ain. Man, ik mag haildaal niks. Gain vet, gain draank, gain sukker en zolt. t Aander zel k mor nait neumen. Niks. En elk zit mie op nek.’
Hai gniflaagt, hapt nog n moal en kikt ien t puutje. Dit is aal wat ter van zien leven over is. Dit pakken zai hom nait òf.
Veur k wat zeggen kin kikt e bie mie laangs en mit grode ogen verschrikt noar zien haand. Din let e scholders hangen en kikt mie aan. Help.
n Steveg vraauwspersoon mit dochter bie aarm komt aanbinzeln. ‘Most toch ais kieken! Jan vreet!’

k Riet ter van tusken.
Dit leed wil k nait mitmoaken. Dit kin k nait verdroagen.
Ik kiek noar boven. Zo’n schiere dag.
Mòt dit nou zo.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

5 × een =

Terug naar boven ↑
  • Literatuur activiteiten

    Geen nieuwe activiteiten