Column column jan glas

Gepubliceerd op 23 juni 2015 | door Webloug

2

‘Schounen stofzoegen’ column van Jan Glas

Schounen stofzoegen

k Was ien Paries  en heb der hail wat ofsjaauwd. Dat wis ik van te veuren, mor ik heb mien echte loopschounen nait mitnomen. Dij lopen haile best, je maarken zowat nait dat je lopen, t binnen n soort grieze sportschounen. Hail veul bejoarden en lu dij t oeterlek niks (meer) schelen kin, hemmen ze as doagelkse dragt aan. Nait bepoald sexy en ik wol der ien modehoofdstad Paries vanzulf n beetje kek bie lopen.

Ik koop mie altied goie schounen, dus heb ik mit glans op mien degelke Van Bommels Paries deurkruusd. En gain bloar of wat din ook. Kalfsleer, meneer! Poar joar leden kocht bie schounezoak Torenbeek aan de A-stroat ien Stad, hail ien de verte nog femilie van mie. De zus van mien opoe, tan Anje, was mit schounmoaker Torenbeek traauwd. k Bin as kiend ain moal bie heur thoes west, de Torenbeeks woonden ien mien herinnern aan de Koeriersterweg, op houk van Paterwoldseweg, tegenover t spoor. As dörpskiend von k dat n deftege rieg hoezen. Wat daipe iendruk op mie maik was n dressoir woar n dail van t beleg ofschoten was ien oorlog.

As Tan Anje ais haildaal oet Stad bie mien opoe op bezuik was mos ik der van mien moe altied even noartou, om taande goidag te zeggen. Ik von dat vervelend want as je taande n handje gaven, bleef ze joen haand vastholden en begon ze mien opoe te bevroagen over ons gezin: Hou is t mit Kees (mien pa) en hou is t mit Aaltje (mien moe), vervolgens ale zeuven kiender bie laans en din stonden je der aal mit joen handje ien heur haand. k Begon zachtjes wat te trekken, mor dat hielp nait. Pas noa n haile zet wer t taande zeker te swaiterg, dat onwilleg kienderhandje, en lait ze joe lös.

Mor, om op dij schounen terug te kommen, toun ik weer thoes was zatten ze onder t gele zaand van Jardin de Luxembourg en Jardin d’Acclimatation. Aiglieks meer stofzaand, hail fien en voalgeel van kleur. k Kreeg t der mit douk en schounebozzel nait goud òf. k Heb stofzoeger der op zet.

Tags: , ,



2 Responses to ‘Schounen stofzoegen’ column van Jan Glas

Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

2 × vier =

Terug naar boven ↑
  • Literatuur activiteiten

    Geen nieuwe activiteiten