Column

Gepubliceerd op 25 augustus 2016 | door Webloug

1

‘Scheuveln’ column van Ingeborg Nienhuis

Scheuveln

Mit aal kiender van schoul gingen wie vrouger ains ien twij joar scheuveln ien stad. Kardinge beston nog nait, dus wie mouken ons rondjes ien t Stadspaark, bie Martinihal. Asof t om Noorderrondritten ging, kregen wie n stempelkoart ien buuts en op baaide körte kaanten van boan konden wie n stempeltje kriegen. Drup aan neus, dikke sjaal om kop, scheuvels onder en goan. Ik zal wel gain beste techniek had hebben as negenjoarege – want pootje-over kon k nait immers – mor kon mie best redden op dij ol kraberkes. Aan t end van mirreg bleek der mor ain kiend meer rondjes te hebben as ik: n jong van elf oet groep aacht. Ik was haile loos op mien bedoemelde en bestempelde koartje.

Dat scheuveln heb ik nooit deurzet, mor dat huft ja ook nait: as t vrust biendt inains elkenain zien scheuvels onder om n endje over t ies te swoaien. Lu dij je nooit van zien levensdoagen op wat sportiefs betrappen kinnen magen toch geern eefkes scheuveln zodroa as dat ainmoal kin.

Dou ik zeuventien was en Kardinge al laank en braid beston, kregen wie te schoul oet es verplicht scheuvelles van ain dij t goud doan het ien scheuvelsport. Hai was n schoulkammeroad wèst van mien laiverd. Dou er mie n moal krukken zag op mien Zandstra`s zee er tegen mien verkeren da`k der mor beter mit stoppen kon – t was nou te loat om nog wat te berieken wat scheuvelloperij aangong. En zoveul soeps was t ook ja nait. Vanoet t oogpunt van ain dij allinneg topsport goud genog viendt is dat wel te begriepen, mor ik scheuvelde omdat t nou ainmoal n onderdail was van gymles, ik doar boetendes plezaaier ien haar en nait omda`k der geern goud ien wezen wol.

Perfester Frits van Oostrom formuleerde ien n lezen ooit trevvend dat elk mens n zeker latent talent het om wat aan te leren, mor dat joen motievoatsie hierbie staark bepoalend is as groadmeter veur joen kaans van sloagen. Ain dij t makkelk aanwaaien komt kin t doarmit ver schoppen, mor ain dij wilskracht het kin nog veul wieder komen – dij foabel van schildpad en hoas gaait hier op (al vien ik miezulf as zeuventienjoarege scheuvelloper toch ook weer gain sneuneuzege schildpad, mor goud). Pas as talent waarken gaait krieg je excellerende atleten, denkers en aander hoast onwoarschienlek goud presterende lu.

Sir Ken Robinson is ook n ‘oardeg schrandere’ kerel (onderwiesdeskundege en veurmoaleg perfester) dij onder meer de Ted Talk* ‘Why schools kill creativity’** doan het. Doarien zegt hai net zukswat as Van Oostrom. Veur aal aander staarvelingen geldt, zegt Robinson, dat leeftied of beroup nait zo zeer van belang binnen: ien joen aigen element leer je t beste. En ook as je aargens nait ien oetblinken mor der wel joen slinger aan hebben is t (vanzulf) goud dat toch te doun. Hobby`s binnen der dus veur joen laifhebberij, zulfs al kniezen ze joe oet om joen origami, Siberieze matroesjkaverzoameln of kleurploaten veur wozzen lu. Je huiven nait goud taiken te kinnen om te mágen taiken – dat idee.

Mit ons sproak is dat nait heul aans. Elk het n noatuurlek talent om toal te leren. Proaten zit ien minsen heur genen. Totdat je n joar of zeuven binnen en as joe niks mekaaiert, kin je zulfs elke toal smui proaten leren. Doarnoa kin je t ook wel leren, mor zel t altied meer waark kosten as op dij noatuurleke menaaier van dou je jonk waren. Dat betaikent nait dat ain hom nait verstoanboar moaken kin ien n nij te leren toal of zulfs genieten kin van n gesprek of t zingen van n laid. n Presentoator heurde ik n moal zeggen dat as hai Grunnegers proaten ging, hai aalgedureg te heuren kreeg dat t naargens noar klonk en dat er t mor beter nait doun kon. Schane vien ik dat, want zo leren je t ja nooit. Je kinnen nait verwachten dat je vot aargens goud ien binnen as je nog mor net begunnen. Of je nou pootje-over kinnen of nait zo smui goan: as je der plezaaier aan hebben proat of scheuvel je toch mooi deur?

*Ted Talks binnen körte tousproakjes deur lu dij wat te melden hebben. Ze worden over haile wereld moakt en binnen vergees op t internet te zain
**https://www.youtube.com/watch?v=iG9CE55wbtY

Tags: , ,



One Response to ‘Scheuveln’ column van Ingeborg Nienhuis

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

vijf × een =

Terug naar boven ↑
  • Literatuur activiteiten

    Geen nieuwe activiteiten