Column Henk Puister 620 column

Gepubliceerd op 3 juli 2015 | door Webloug

8

‘Rosa heur rokje moakt wat lös’ column van Henk Puister

Rosa heur rokje moakt wat lös

Strik het op t zunovergoten terras gain oge òf van zien iPad. Hai is formeel kled. n Stroalend wit overhemd mit laange maauwen en n swaarde broek mit n mèsschaarbe volle. Noast hom zit Knuvvelbere. Gekobe zunnebrille op zwaitneuze. Hai het n lichtblaauw overhemd mit blode aarms aan en n crèmekleurege broek van dun stof. n Braide bast het e en staark ontwikkelde spierbalen. Zien kop is goudeghaid zulf. ‘Doe aal mit dien iPad. Gooi mor in mien pedde, dat ding!’ zegt e. ‘Most zain, man, wat veur moois der verbiekomt. Kiek, doar hest Snibbeltje ook. Achter dij kinderwoagen doarzoot. n Poppie dij heur poppie schoft. Ik geef heur nait meer as vieftien. As ze dat al is. Zit gain snibbeltje vlais aan dat haile wicht. En woar is heur kont. Zugst doe dij? Nee, doe zugst niks. Allain dien iPad. Man, is t endelk zummer, kriegen wie vergees wat te zain en doe maarkst der gain spier van.’
Strik kikt verboasd op: ‘…Zeest wat? Hou loat leven we. Mouve al weer hèn?’
‘Kiek doar ais,’ ropt Knuvvelbere. ‘Wat n kloetenstamper van n wief. Ast doar onder komst den bist der west, Strikkie. En wat n dikke, swaarde boksem het ze om heur reet. Wat n bruinust zel dat wezen.’
‘Kin k nait mit zitten,’ komt t antwoord sloereg.
Knuvvelbere gript kraande veur hom op toavel en zwaait dermit.
‘Doe leest gain Dagblad, Strik, hè. Doarom waist doe ook nait dat Rosa heur rokje hait nijs is. Kraande staait vol van heur belevenizzen. Op n zwoule oavend in juni is zai vol in heur kruus grepen deur n kerel in n kefee. Aalbaaident haren wat op. Hai kon zok nait bedappern en pakde heur stief beet van ondern. n Superkört rokje druig Rosa, mor dat mag niks ofdoun. Ofblieven! Wat nait van die is, magst nait aan zitten. Rosa wol n doad stellen en het t aangeven. Ieder moal as ik nou dij foto van Rosa in zotterdagkraande zai, boven heur verhoaltje, den goan mien gedachten noar heur kruus. Bin ik gezond, Strik, of bin ik n dikke viesderd?’
‘n Reusachtege viesderd bist,’ zegt Strik overtuugd. ‘Ze mouten die votdoalek verbannen noar t grode gaaile Berenbos.’
‘Binnen doar ook berinnen, Strik?’
‘Allain woepsterds van iesberinnen. Komst bie heur in d’buurt den veraanderst op slag in ain klombe ies. Den is t veurgoud verkeken mit dien hitseghaid.’
Knuvvelbere roadpleegt allozie. As baaide mannen sloom votlopen zegt Knuvvelbere: ‘Dus, zotterdag, Strik, hè. Even denken om Rosa heur rokje.’

Tags: , ,



8 Responses to ‘Rosa heur rokje moakt wat lös’ column van Henk Puister

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

elf + 4 =

Terug naar boven ↑
  • Literatuur activiteiten

    Geen nieuwe activiteiten