Column fieke gosselaar

Gepubliceerd op 2 oktober 2015 | door Webloug

0

‘Rode lippen’ column van Fieke Gosselaar

Rode lippen

Aigenlieks wait ik wel dast nooit lippenstift op doun most ast nog vief minuten de tied hest. Haildaal nait as t lippenstift is dij long lasting is. Doarmit wordt bedould dat t muurvast op dien lippen plakt zodroa t opdreugd is. Op zich n goie oetvinding. Kinst uren laank eten en drinken zunder dast huifst te denken aan t biewaarken van t rood. Minder handeg is t, as je der heulemoal nait meer om denken. Op n duur kriegst din toch dat kwaliteit van t rood minder wordt en der net nog n lelijke donkerrode streep om boetenraand van dien mond hin zit. Ik schat dat t n uur of drij gain problemen oplevert.
Oflopen zundag mos ik optreden op Grunneger Dag, soamen mit Jan Glas, zodat ik netuurlijk wel goud veur de dag kommen wol. Ik haar nog vief minuten en smeerde vlug rode long lasting lippenstift op. Schaif! Boeten de randjes! t Zag der nait oet en t dreugde al op. Mit n washandje bounde ik boudel der weer òf. Doarnoa nog met n doukje vol make-up remover en nog n moal mit t washandje. Ondertussen was mien kinne rood, nait van lippenstift mor van de bounderij. Snel wat verzachtende crème der op smeren, docht ik. En den mor gewone lippenstift, aine dij der wat makkelker ofgaait as t boeten de lientjes is.
‘Wat hest doan?’ vroug laif dou ik weer noar beneden kwam. ‘Bist knalrood.’
Ik mompelde wat over long lasting en schrobben mit washandjes en hoopte dat deur de frisse wind op fietse mien rode hoed wat wegtrekken zol.
‘Hest mooie rode lippen ja,’ zee Jan Glas dou ik van fietse ofstapt was.
‘Niks meer in de rest van mien gezicht te zain?’ vroug ik en ik vertelde mien haile verhoal over de dikke lippenstift dij zo goud zitten blift, dij nooit secuur op te smeren is in vief minuten tied, dat ik beter waiten mos, dat ik t al docht haar veurdat ik der mit begonnen was en der toch mit aan de gang ging, wat rezulteerde in paniek en haard schrobben mit n washandje. Dat ik zo bliede was dat hai der niks meer van zain kon.
‘Schrief der mor n column over,’ zee Jan.

(Foto © Jan Glas)

Tags: ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

1 × twee =

Terug naar boven ↑
  • Literatuur activiteiten

    Geen nieuwe activiteiten