Column Tonko Ufkes, column, goed lek

Gepubliceerd op 15 februari 2016 | door Webloug

0

‘Retour’ column van Tonko Ufkes

Retour

Al n schofke stoa k goed zichtboar veur de boekwinkel en zie hoe ientussen de hiele trein leeglopt en e mensen t perron op golven, laangs me schoeven en verdwienen. Misschien komt er toch niet met dizze trein, mor net as k mien tillefoontje pak, stijt n man noast me. n Kleurde muts, n dikke jas en n rolkovverke; dat moet hum weden en ien mien oor fluustert er: ‘Jean-Luc.’
‘Moi’ en ik geef hum n haand, ‘moi, we moeten die kaant uut. En, welkom ien Grunnen!’
Soamen lopen we gaauw noar de zieduutgaang, Jean-Luc volgt tot bij de auto en wacht tot k zien kovverke der ienzet heb. Eerst as ik zit en hum noast me wenk, stapt er ok ien.
Zwiegend rieden we over de ringweg. Ik vien t best – huuf niet zo neudeg te proaten – mor as we boeten Stad bennen, begun k toch n gesprek.
‘Is t dien eerste keer ien Grunnen?’
Eefkes kieken we nkander aan en k zie dat zien kleurde muts omhoog schoven is, tot bovenop t kroeshoar, de jas zit stief dichtritst. Mor hij moet wat zeggen, want ik kin niet hieltied noar hum kieken onder t rieden; zeker op dizze krappe weg blift het opletten.
‘Is t dien eerste keer ien Grunnen?’ vroag ik doarom vannijs. Der komt gien antwoord en ik zuuk al wat ien mien schoolfraans om.
‘Ja.’ t Komt der zaacht uut, t is amper te verstoan. ‘Ja meneer,’ bliekboar het hij deur dat t aans moet: ‘ik waas wel n keer ien Zwolle.’
Het grapke over de wereld boven Zwolle lijt veur ien mien mond, mor ik hol me ien. Ik vertel hoe mooi t hier is bij zummerdag: de vergezichten, de kringende roofvogels boven de groanvelden en dat Eenrum de hoogste dörpstoren het. Der komt gien antwoord en as de natte snij n mement niet zo tegen de veurruut klapt, kiek ik uutzied: Jean-Luc zit noar veuren bogen en stoart noar de weg recht veur ons, hij het e Eenrumertoren vast niet zien.
Ik zwieg.
‘Meneer’ heur ik geliek, ‘meneer, brengen joe mij vanoavend ok weerom noar t station, noa mien lezeng?’
‘Vanzulf. Meteen.’ As ik uutzied kiek, zie k zien rug noar de leuneng goan.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

zestien − zestien =

Terug naar boven ↑
  • Literatuur activiteiten

    Geen nieuwe activiteiten