Algemeen

Gepubliceerd op 7 maart 2012 | door Webloug

0

Pergram Dag van de Grunneger Toal

Dag van de Grunneger toal zotterdag 17 meert mit n ofwizzelnd pergram veur jong en old
Op zotterdag 17 meert wordt veur d’daarde moal de Dag van de Grunneger toal holden. D’organizoatsie is in handen van t Huis van de Groninger Cultuur, Stichting Grunneger Toal, Biblionet Groningen, Stichting t Grunneger Bouk en t Regionaal Historisch Centrum Groninger Archieven. De Dag vindt ploats in Meertmoand Dialectmoand. Tieden: van 11.00 tot 17.00 uur. Ploats: in t gebaauw van de Groninger Archieven aan Cascadeplein 4 in Stad!
Aandacht veur de jeugd
Nij in t pergram is d’aandacht veur de jeugd. Olaf Vos geft mit de Bond tegen Harries en kinder d’oftrap in de Meziekkroug mit nije Grunneger kinderlaidjes.
Ook is der n optreden van de formoatsie Wat Aans! mit Grunneger rap.

Veur kinder is der n spultje in t kinderhörntje mit veurlezen, n spannende digitoale klunderloa en hier kinnen der gehaaimschriften van Fré Schreiber ontsieverd worden. Bie t inleveren van d’oplossen kriegen d’kinder n verrazzen.
Ofwizzelnd pergram mit Grunneger meziek, theoater, lezens, literatuur en kurzussen
(kiek ook op: www.dagvandegrunnegertoal.nl)
Haile dag is der n keur aan aktiviteiten woarbie t Grunnegs in aal zien geuren en kleuren centroal staait. Ie kinnen Grunneger meziek heuren, flitslezens volgen, documentaires zain, Grunneger broeskurzuzzen volgen, luustern noar schrievers en dichters, mitdoun aan n quiz, veul Grunnegs proaten en ook veul nijs opdoun op de toalmaarkt.
In de Meziekkroug binnen der wieder optredens van t trio Lianne AbelnNettie Venink en Ed Wennink mit gitarist Jan PenninkhofJan Henk de Groot & Band en Gert Sennema mit WeskantstadHans ten Have verzörgt mit zien band de slotact.
Tussendeur speult Grunneger Sproak verschaaiden ainakters. Productie is regeld deur Ankie Bours en regie dee Francien Geertsema. n Vermoakelk spel van aantrekken en òfsteuten…
Bezuikers kinnen strandjen mit Grunneger schrievers en dichters dij veurlezen oet aigen waark en de bundel ‘Oetzicht’ dij op de Dag prezentaaierd wordt. Ook kinnen mìnsen luustern noar verhoalen oet t Westerketier.
Der worden flitslezens geven over t Grunnegs. Specioale aandacht is der veur t belang van t Grunnegs in de zörg in de lezen van Hilda Baptist, dij as humanitair roadsvraauw en geestelk verzörger joarenlange ervoaren het mit t waark in verzörgenstehoezen en mit verstandelk gehandicapten. Jan Sleumer geft n lezen over streektoalen en streektoalschrievers, Siemon Reker over Zuzooien en Sies Woltjer over De Heliand.

 
In de broeskurzussen over Grunneger literatuur, Grunnegs proaten en Grunnegs schrieven en spellen kinnen mìnsen heur Grunnegs biespiekern. En ze kinnen al heur vroagen over t Grunnegs kwiet bie meester Kriet.
Oetlangen K. ter Laan-pries
Op dizze dag wordt deur diptaaierde veur cultuur Piet de Vey Mestdagh de joarliekse K. ter Laan-pries van de Stichting t Grunneger Bouk oetlangd.
Specioale oetgoave tiedschrift Moi!
Der is weer n biezunder tiedschrift moakt veur de Dag van de Grunneger toal: ‘Moi’! Moi wordt wied verspraaid deur d’haile pervinzie en ligt vanof ènd feberwoarie vergees bie o.a. boukhandels, bibeltaiken en VVV’s. Moi is ook te downloaden via www.dagvandegrunnegertoal.nl onder d’kop Moi.

Moi staait vol mit vroaggesprekken mit verschaaiden Grunnegers, dij vertellen over heur toal en waark. t Tiedschrift is riekelk opsierd mit foto’s van Jan Glas. Ook t pergram van daarde Dag van de Grunneger toal staait der in, net as informoatsie over allerhand Grunneger instanties.
Lezers van Toal en TaikenKrödde en Feith kriegen Moi toustuurd. Wèl n exemploar bestellen wil, kin n mail sturen noar: info@huisvandegroningercultuur.nl
Tougang van de Dag van de Grunneger Toal is vergees!
Meer informoatsie: www.dagvandegrunnegertoal.nl
of bie t Huis van de Groninger Cultuur, Henk Scholte of Ida Nieboer (050-5992060/050-5992061)
e-mail: info@huisvandegroningercultuur.nl

Foto’s ©Jan Glas
Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags:



Reacties zijn gesloten

Terug naar boven ↑