Column column jan glas

Gepubliceerd op 26 oktober 2015 | door Webloug

1

‘Paul’ column van Jan Glas

Paul

Wat is der van Paul worden? Ik wait allinneg zien veurnoam nog, dus zuiken op internet het gain zin. Ik struun wel ais op internet noar verdwenen lu van hail laank leden. Nait om ze weer te ontmoeten, want ik heb t nait zo op t verleden, mor bin wel nijsgiereg. k Von ais via internet n luk scharreltje van laank leden terug op de moordliest van de Telegraaf, en noa wat verder zuiken las ik n intens treureg verhoal.
Op Paul was ik was n beetje verlaifd. Nou binnen der Grunnegers – zulfbenuimde, echte Grunnegers – dij bie t woord ‘verlaifd’ of ‘holden van’ stoom oet de oren komt. n Echte Grunneger zegt zukswat nait, ‘verlaifd’, omdat t gain understatement is, t is veulste royoal veur n Grunneger! n Echte Grunneger is nait verlaifd, dij mag ain ‘wel geern lieden’ of zeggen dunnegjes ‘hufs om mie nog nait vot’ en meer van dat soort folklore. Ik kin onderhand de oetdrukken ’t kon minder’ mor naauw meer heuren; ienhold en grap binnen der al laank oet en òf. t Liekt allain nog n schampere menaaier om mekoar der onder en op plek te holden.
Mor goud, Paul. n Mooi, oardeg, laank jong, broen hoar op kop en op bòrst en k was slim benijd woar aal dat hoar nog meer touhil. Wie waren ongeveer van zulfde leeftied en zagen nkander voak ien discotheek The Duke aan t Hoogstroatje ien Stad. t Was zo rond 1981, ik wait dat nog omdat wie baaid de bloumlezen Nederlandse Poëzie van Gerrit Komrij lazen, dij toun nog nait zo laank oet was. Wie haren t der wel ais over wat wie mooie gedichten vonden ien dij bloumlezen. Ik zette mit potlood n kruuske bie mien favorieten, hai gaf ale gedichten n siever. Ik wis dat k gain kaans maik bie Paul want hai viel op oldere mannen. Mannen dij veul en veul older waren. Ik heb t perbaaierd, k bin n moal, noa slutenstied van Duke, snaachts mit hom noar zien hoes lopen, mor k wer nait binnen nuigd. k Zag dat e der mit aan was, mit zo’n hunkernde, jonge jong.
Ik heb nou de leeftied van de mannen woar Paul toun op viel. Hou waarkt zukswat? Zol ik, as k ooit dij Paul nog ais tegenkommen zel, nou wel binnen nuigd worden? Loont t om op Google Search de zuikterm “Paul ± 57” ien te tikken?

Tags: , ,



One Response to ‘Paul’ column van Jan Glas

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

tien + negentien =

Terug naar boven ↑
  • Literatuur activiteiten

    Geen nieuwe activiteiten