Column henk puister, column

Gepubliceerd op 21 september 2016 | door Webloug

0

‘Pasja’ column van Henk Puister

Pasja

Rondomheer leef k maank d’honden. Blafkonten en goudzakken. Buurman links, buurman rechts, buren boven, buren achter: aalmoal beschikken ze over zo’n dikke blafkont. Mennegmoal is mie vroagd of geblaf mie nait steurt. Nee. k Hol van honden. As ze mien katten mor ofblieven. Bovendat geft t n vaaileg gevuil. Alles wènt op n duur. Dat n bunzelachtege kennes mor zelden meer n kop kovvie hoalen komt, neem k op koop tou. Mor dij orke in Nij – Bunen dij in de zummerhètten van augustes swoar gewond ruik deur bietende rottweilers: alleriezelks.
Verstaand kin der nait bie as n kaalm en oardeg mins inainen overvalen wordt deur n vloage van moordzucht en touslagt. Schoot n ketaktje lös. Gevolgen nait te overzain. Zoks kin ook mit honden gebeuren dij over t aalgemain bekind stoan as d’laiveghaid en d’onschuld zulf. Koren op meulen van hondenhoaters. Vouer veur psychologen en veur psychioaters. Is doalek doodschaiten d’beste oplözzen? Meschien most kaizen veur vredeg insloapen loaten deur n spoitje. Kin ik nait over beslizzen.
Buurthonden kennen mien wonen op prik òf. En smoak van mien meelkoekies ontholden ze nog beter.
As dij aine jonge vraauw mit Pasja luip, bleef baist d’haile tied stokstief tegen mien huus over stilstoan. Ze kreeg heur nait meer mit. k Vloog al tou deure uut mit n haandvol meelkoekies veur laive Pasja mit heur aanhaankelke glimmers. Zai steertkwispelde van bliedeghaid. d’Jonge vraauw trok heur vernieneg mit op t laangeleste.
Ik keek daaier noa en aalgedureg bleef t stilstoan om achterom te kieken. Ik ston der nog. k Mos mie inholden. Mor as zai zulf kind haar den haar Pasja mie wizze uutzwaaid as ofschaaid. Ordentelke en goud deurvouerde hond in dien zaachtswaart glaanzende vacht, wat trofst doe t mit dien boasie.
‘Pasja is dood,’ snötterde ze. Dou woonden zai en hond al laank op n aander stee. ‘Ik dacht, ik bel je om dit te vertellen. Jij mocht Pasja ook zo graag ja.’
Of ik heur mog! Daaier druig wat ongenezelks bie zok. Verkeken zoak. k Zöchde kört noar d’juuste woorden. t Overliedensbericht kwam mie recht even aan. Op mien broek drupde t.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

negen + 14 =

Terug naar boven ↑
  • Literatuur activiteiten

    Geen nieuwe activiteiten