Column Jan Glas

Gepubliceerd op 21 juni 2016 | door Webloug

2

‘Oskerderziel’ column van Jan Glas

Oskerderziel

Vrijdag heb k veurlezen ien kelderbar van VERA tiedens twijde bundelprizzentoatsie van ‘Begrafenis van de mannen’ van Anneke Claus. n Zoaltje dat der altied wel zin ien het, t wer din ook n mooie prizzentoatsie. Waarm. ‘Wat n laive minsen, dichters,’ zee n vriendin dij mit was. t Geluud was goud regeld. Dat lu joe heuren kinnen is nait t minst belangrieke bie veurlezen. Of nait? n Poar week leden mos ik ien Noorpolderziel bie ondergoande zun gedichten veurlezen op diek. Sfeervol zol t worden. Der ston n nuvere wiend op diek en naargens n microfoon. Boeten veurlezen is lasteg zunder verstaarken, en haildaal as t waait. ‘Dan gebruik je toch gewoon je creativiteit,’ zee ain van de muzikanten dij ien t zulfde pergram zat. k Kon hom mor naauw verstoan; k haar wiend ien rug. t Wicht van organizoatsie keek of ze n beste dunderklap ien Keulen heurde. Microfoon…? Woar haar ik t over? Oetindelk heb ik benedendieks mien gedichten wereld ien belkt veur t braide terras van café. Hou sfeervol is dat!

‘Volgend joar Fanfare van Oethoester muziekverainen Opwaarts bie ondergoande zun over diek hinneweer marsjeren loaten,’ zee ik tegen ain dij bie Opwaarts zit en bie mie aan toavel zat. Wie keken noar diek en ik mos wat votsloeken, bie t idee allain al. Nou al ontroerd, n joar ien t veuren. Mien ollu zeden traauwens nooit ‘Noordpolderziel’ mor ‘Oskerderziel’. Ze gingen der wel ais op fiets hìn te genoaten hoalen. Dij genoaten waren lekker.

Tags: , ,



2 Responses to ‘Oskerderziel’ column van Jan Glas

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

vier × 4 =

Terug naar boven ↑
  • Literatuur activiteiten

    Geen nieuwe activiteiten