Column Fieke Gosselaar, column

Gepubliceerd op 23 januari 2015 | door Webloug

0

‘Oploaders’ column Fieke Gosselaar

‘Woar is mien oploader van telefoon?’ vroagt laif.
Ik kiek op t kastje. ‘Hest hom doar nait liggen?’
‘Nee, kin ik dij van die lainen?’ Hai kikt zuikend om zoch hin woar oploader is.
Ik schud mien heufd. ‘Doar zit mien aigen telefoon al in, dij was ook leeg.’
Ik heur laif trap noar boven lopen en weer noar beneden stampen. ‘Vonden, hai lag boven.’
Even loater zuikt hai verlengsnoer veur oploader van onze laptop. Accu van laptop is stokkend, zodat oploader der vast aanmot. Aans gait hai binnen n seconde oet. Soavends holdt halverwege t tandenpoetsen electrische tandenbozzel der mit op. ‘Woar is oploader?’
Der binnen zoveul apparoaten dij aal in de oploader motten en as je oploader kwiet binnen, is t apparoat niks meer weerd.

Dizze week haar ik n cursus Cybercrime en doar vertelden ze dat over vief joar sikkom alle apparoaten in hoes in verbinden stoan mit t internet. In 2008 waren der veur t eerst meer apparoaten mit t internet verbonden dan dat der minsen op de wereld rondluipen. In 2011 stonden der tegenover elk mins, toun ongeveer 7 miljard, twai apperoaten dij mit t internet verbonden waren. t Kin nog veul drokker worden in Eemshoaven. Elk apparoat denkt zulf noa en slagt alles op. Koelkasten dij die vertellen dat melk aan t verzuren is. Televisies dij zeggen dast nou echt sloapen goan most. Meziekinstalloaties dij zulf vroleke meziek opzetten as t volgens weeronline te laank n grieze boudel west is.
Wie mogen hopen dat t probleem van de oploaders tegen dij tied verholpen is. Oh nee, dat kinnen we den aal opzuiken op t internet.
‘Woar is mien oploader? Hest mien fietssleudel zain? Woar ligt mien onderboksem?’
‘Most even op t internet kieken’, zeg ik den.
Van drij kanten begunt t piepen. Oploader ligt op t kastje, fietssleudel piept in buutse van jaze en onderboksem bleek hai al aan te hebben. Zo makkelk wordt t den.

 

Fieke Gosselaar leest HIER t verhoal veur ien t pergrammoa De Centrale op Radio Noord.

(Foto © Jan Glas)

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

6 − 5 =

Terug naar boven ↑
  • Literatuur activiteiten

    Geen nieuwe activiteiten