Column Jan de Jong, column

Gepubliceerd op 24 juni 2015 | door Webloug

0

‘Op zuik’ column van Jan de Jong

Op zuik

Hebben ie dat ook? Sums? Vrouger?
Of is dat leeftied meschain.

Ik wel. Dat mie t aan schut. Dat k onrusteg wor.
Nou haildaal. Ik kreeg n tillefoontje: ‘Jan, astoe nog zain wilst doarstoe vrouger woond hest
moutst ter nou bie weden. Zai breken ales òf.’

Oere. Koalslag. ‘Ons blok’ staait ter nog.
Wàt n leutje hoeskes. Zat sloot en t gruinlaand zo dicht achter t hoes?
Dat wie hier mit kander ien woond hebben.

Ik kiek eefkes deur t keukenglaas.
Zotterdagoavends ien tob. Op tocht kleumen. As oldste t lèste. Nog n luddek kedeltje waarm wotter der bie ien. Nait soezen, waarm zat. En stief bounen op n soeterge zaipraand om t lief bie t ofdreugen.
Noatied op rieg veur kelder. n Dikke lepel levertroan, mit broen sukker noa. Kokhaalzen.

n Zuske geboren, dij nou al oet tied is.

En doar ston dou mien krielhokje en loop. Wyandotten. Opa, dij n zundag op veside was mos heur mit aal geweld mit. Ik zol nijen hebben. Ik wol gain nijen. Dizzent.
Zundoags der op haar oma n poar weckvlèzzen bie heur, veur soep. ‘Lekker hè, jonges?’
Aacht joar. t Is nait weer goud kommen.

Veuraan toen n vogelhok mit knarries van pa.
Roek van flitspuit mit DDT wirrelt mie eefkes om neus. Neefkes.
t Toentje, mit eerdbeien en boontjes. Dubbele witten zunder droad.

‘Wat zuikst mien jong!’
Hai leunt swoar op n handstok. Ol boer kikt over zien laand.
Touknepen oogjes vanonder n daip boven d’ogen zundoags houdje, dij op zien oren hangt.
Krimpen bie t oller worden zai ik.

Ik zeg dat wat ik zuik der nait meer is. Hou t was en west het.
Dat ik nait meer dìj bin, nou ik zai wat ter nait meer is.

‘Nee,’ zegt e, ‘dat zai ik. Woarbistoe ain van?’

Ik zeg dat ik van gainain was en bin, omreden ik hier haitied naarns bie heurd heb.

Ol boas schudt kop, zuikt laank ien vrouger.
Mit lösse handen wiest hai mit stok, noar mie. ‘Ik wait welstoe bist!’

Ik zeg ‘was’.
Din heur k van dij aander.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

10 + 7 =

Terug naar boven ↑
  • Literatuur activiteiten

    Geen nieuwe activiteiten