Column Tonko Ufkes, column, goed lek

Gepubliceerd op 4 april 2015 | door Webloug

0

‘Op petret’ column van Tonko Ufkes

Op petret    

Mien leste streken met e fienste kwast bennen slim belaangriek. Stoareg worden de snorhoaren mooi laang, bieten de hoektanden echt ien e patries en ien t lest stijt t zaachte hoar ien e puntoren goed op t doek. Swaart, donkerbroen en grieswit; n vos het n nust kleur – zeker ien zien kop – mor laangzoam wordt het goed. n Levend roofdier gruit, nog eefkes en t stapt zomor uut het schilderij t atelier ien.
Met n buusdoek wis ik vannijs het zwit vot, want t komt der nou echt op aan; der moet glaans ien beide ogen. t Gijt om n puntje, n drupke vaarf wat krekt op t juuste plak valt. Dit is het mooiste en toegelieks het moeilekste.
Schildern is aanleg, sekuur kieken en veul doen. En ik heb het al zo voak doan dat t zunder veurbeeld gijt, gien foto of zukswat is neudeg. Zulfs de oogkleur, t glimmen loaten, doe ik altied zo uut e haand: Rusteg mengen op t pallet en dan gewoon aanstippen.
Het kleinste kwastje hol k tussen doem en wiesvinger en moak twee veegjes, best, en nou n grote stap achteruut. Ien t veurbijgoan kiek ik toch eefkes uutzied, ien e spiegel; as vanzulf, veur de wissegheid.
Dan trekken mien ogen weer noar t schilderij.
t Liekt sprekend.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

15 − vijftien =

Terug naar boven ↑
  • Literatuur activiteiten

    Geen nieuwe activiteiten