Column Jan de Jong, column

Gepubliceerd op 6 mei 2015 | door Webloug

0

‘Oorlogje speulen’ column van Jan de Jong

Oorlogje speulen

Het knalt en bèlkt. Runnen gonnent ien vremd gruin goud en scheuren alerhande auto’s, tanks of wat doar op liekt bie stroat laangs. Valen gonnent dood aan kaant ien t gras. Minsen klappen.

Ongewild beland k ien oorlog. Dikke riegen volk dij heur vergappen. Mainst oldern en ollu mit leutje kiender. Leeftied van tillefoon ien haand, kompjoeterspelletjes en gamen mist.

Wat verloren stoa k op ofstand en kiek om mie tou.

Al dik n moand kwam t aan mie veurbie. Bieainkomsten, herdenkingen, tenail, optredens en doagenlaank oorlogspul. Kranten stoan der vol van en verslaggevers hebben t drok mit nijs moaken.
Komt aal joar meer bie, bliekt t veurege net eefkes aans te weden. n Punt of kommoa verkeerd en wel haar wat op zien gewaiten braidoet oetmeten. t Haar zo weden kind, mor ook aans.

n Ol man kikt schrikachteg ien camera. Slovve ogen en twievel. Zo was t volgens hom goan. Docht e. n Interviewer stuurd en trekt. Emotieloos vertelt vraauw hou moeke zegd haar dat t gebeurd was. Zo zol t goan weden.

Vatteg viefenvatteg maggen wie nait vergeten. Dat was aarg. Hail aarg. Aarger bestaait ter nait mouten wie leuven.

2015
n Dagraais hier vandoan zitten wie maank oorlog. Begunt dood en verdaarf. IS, Al Qaida, Boko Haram en ien t beloofde laand is oorlog nog nooit vot west. Bezet wonen.

Aal doag vernijs op radio, tillevisie en kraant. Binnen toch nog haitied overaal kampen. Gain gaskoamers. Wel massoagroaven. n Ontelboar aantal minsen wordt doagelks executeerd, haals ofsneden of aans dood moakt. Miljounen onderhand.

Echt oorlog.
Aal doag chaos en nait te overzain ellèn.
Ik kin dat. Roek van vluchtelingenkampen. Onder vuur liggen. Granoaten dij stoefbie iensloan. Ain dij doodschoten of opbloazen is.

‘Mooi nait?’ Vraauw mit n kwoajong aan haand kikt mie aan. Man glundert. ‘Prachteg! Maggen zai van mie wel voaker doun.’
‘Oorlog,’ vroag ik.
‘Nee, bevrijding.’ Vraauw kikt mie ais aan.
‘O.’

IJscoboer en petatkroam hebben t drok.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

17 + twintig =

Terug naar boven ↑
  • Literatuur activiteiten

    Geen nieuwe activiteiten