Column Jan de Jong, column

Gepubliceerd op 23 februari 2015 | door Jan Glas

2

‘Om zaip’ column van Jan de Jong

Om zaip

Deurtjes slougen noar weerskanten open. Pèts! Koek … zee e nog zachtjes. Hai haar gain schien van kaans, vil veurover en bleef op elf uur hangen. n Luddek fluoriserend pluumke stak hom overdwaars oet t lief.

n Abbedoedas aan kop dee mie t wit van ogen scheel veur t gat draaien.
Lèste levensdag van eerste buks en koekoek was teld. Aal wat ien keuken achterbleef was stilleghaid.

Schaiterij en oorlog zat ter vroug ien. De Filistijnen, Kruustochten mit ridders, Hoekse en Kabeljauwse twisten en aal Godsdainstoorlogen. Veul loater kwammen Asterix en Obelix pas. Mor dat gong meer om everzwienen en draank.

Wie slopen en kropen deur boskederij. Ien overaal of op blode knijen mit stevels. Mit piel en boog, swoarden, ol buksen en tomahawks wer aal t geboefte, minderweerdeg volk en dij van n aander kerk om zaip holpen of scalpeerd. Roegte van onderwalen, fietsbanden en t daklozen hoes werden ien lichterlaaie stoken. Aal vuurtjebrandend zaaiden wie dood en verdaarf en wer t laand ons touaigend. As wie nait op wonsdagmirreg op t plietsiebero zaten teminnent. Strafregels schrieven.

t Is nooit haildaal overbederd.
n Levent onder dainst.

Kiender kregen gain pistolen, geweren of aander oorlogstuug. Wel n indioane tìnt mit veren en n piep. As ie vechten kriegen ie klappen. Proat en luuster was bosschop.
Ain man ien t gruin over vlouer en n geweer was genog.

En filmpkes en doodschaiten op games dut nait zeer? Ik wait t. Ik stel mie aan. Gebeurt ja niks.

Mor wel ainmoal doodschoten is? Of haals ofsneden?
Gewoon vernijs begunnen?
Restart Game?

Even oet eerns. Knip ais mit vingers. Dou mor ais. Knip.

Is dat weerde van t leven?

Ol klokje. Joaren laank zagen wie ien keuken stilstoande stilte van oet tied kommen.
Aal doag gloop e mie aan. Vanof plaank boven waarbaank, ien schuurtje. Mit van dij dovve ogen. Koekoek.

Ik dreum nog wel ais.

Tags: , ,



2 Responses to ‘Om zaip’ column van Jan de Jong

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

zeventien − 8 =

Terug naar boven ↑
  • Literatuur activiteiten

    Geen nieuwe activiteiten