Column Jan de Jong, column

Gepubliceerd op 13 april 2015 | door Webloug

0

‘Ofraaizen’ column van Jan de Jong

Ofraaizen

n Vrouge veujoarsmörn.
Russische meesters. t Museum ien Stad.
Ik bin nait d’eerste.

Hier mout zai veur kommen weden. t Laand van doar zai geboren is.
Zai staait as ien grond vaastgruid. Heldere ogen ien n zaacht snoetje. Sprikkeg en breekboar.
Schuun achter heur blief k stoan.

t Swiegend landschop glidt aan heur veurbie. Droufgeesteghaid van naacht votjagd deur t broken daglicht. Wolken hangen stokstief stil boven t omdeellopend laand mit zien padjes. Aarns, doar beneden roeskert t wotter kronkelnd deur t stroekerij, nog net zichtboar veur d’ainder.
t Woonstee van nachtegoal.

Zai dut ogen dicht en gniflaagt.

Dizze mörn het zai heur boudel bie nkander zöcht. Anna, jentege dochter van schoumoaker.
Ien twijduustern van zien waarkploatske was Nikoláj Dólstojev van zien kruk kommen. n Schou ien ain haand, ien d’aander n liemkwast. Hai haar wel twij woorden proaten doan. Goie raais.

Zai pakt n buusdoukje. Heur ogen en wangen glinstern.

t Eerbiedeg duuster van t aiwenold bos slut hom om koetsewoagen. Roek van hars en noalden vullen heur gedachten.
Zai was dou zitten goan aan raand van bos, op t nog natske mos. Hai bleef stoan, Iljits Sèlnikov. Ien stilte van zien kaizen veur onder dainst huverde zai bie t vergreld schraauwen van n hoavik. Triesterghaid woarde rond tusken stoatege stammen. Nooit, nooit zel der licht omdeel valen.
Toch, aarns aan t ende van t bos zol der n zun schienen.

Zachtjes nuuntjet zai n irmos, verbiendt zo heur gebeden.
Zai zel heur laifde vienden.
k Wait t zeker.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

6 + 1 =

Terug naar boven ↑
  • Literatuur activiteiten

    Geen nieuwe activiteiten