Column Jan de Jong, column

Gepubliceerd op 14 september 2015 | door Webloug

2

‘Oetslag’ column van Jan de Jong

Oetslag

Jong zit op sloapkoamer en kikt ien t spaigeltje op zien bero. n Poest mit n gele kop op kin en drij glìnne rooien op t veurheufd gloepen hom aan.
Hai krigt buusdouk en baaide doemen goan richten kin.

Beneden ien koamer zit t hail koor kloar. Opa en oma, bruiertjes en zuskes, n buurvraauw en moeke dij t gat nait aan stoul holden kin.
‘Fijn dat e zien Atheneum diplomoa krigt,’ zegt oma. ‘Dat goud leren het e van zien opa, hai is nait veur niks verneumd.’
n Zuske op n hoge stoul stekt baaide handen onder t gat en wupt mit bainen. ‘Of nait!’
Moeke geft heur n fleer en krigt geliek tillefoon. Zai luustert eefkes. Joa, hai dut t wel.
‘Geduld,’ bromt opa. ‘Binnen meer.’

Oetslag: ofloop, gevolg, rezeltoat, oetkomst, oetloop, poetsen, schimmel, vlekken, deurslag, overwicht, tougift, report, oetbarsting.

Zenen, pien ien tlief en zin aan kouk. Wachten op bliedschop of verdrait.

“Een mens lijdt dikwijls het meest door het lijden dat hij vreest.” (doch dat nooit op zal dagen. Zo heeft men meer te dragen, dan God te dragen geeft. Nic. Beets)

‘Ik heb goed nieuws.’ Zai kikt mie aan. ‘U bent schoon. Helemaal schoon. Geen kanker meer.’
Mien haals knipt dicht. Proaten gaait eefkes nait. Ogen lopen vol mit wotter. Ik sloek en sloek.
‘Dat mocht ook wel eens een keer,’ zegt mien vraauw. ‘Zulks nieuws.’
Nait te begriepen. Hou kin dit nou.
Aachtboan is stopt. Ik mout oetstappen. Wat nou, dit kin toch nait woar weden.

t Is woar. Wie kriegen oetleg.
Schone snievlakken. Tumor, lymfeklieren en ale oetzaaiïngen binnen votnomen. Is gain kanker meer. Schoon.
Wie waiten t eefkes nait meer.
Ik heb stuur over mien aigen leven weerom kregen. Allinneg nog wat controles.
Nait meer leven ien dag van vandoag, en guster en derveur hebben wie had. Vernijs n toukomst.
Hou nou.

Nic. Beets zien laimeneer holdt ons mìnsen mooi veur t zootje.

Zundagmörgen, zuneg aan licht.
Ik zit op baank en stoar noar boeten.
Struunt n keudeldoempke deur klimop. Inainen springt e veur t glaas ien vensterbaank. Kaalm blift e zitten en kikt mie aan.
Woarom kommen der nou troanen.

Tags: , ,



2 Responses to ‘Oetslag’ column van Jan de Jong

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

18 + 11 =

Terug naar boven ↑
  • Literatuur activiteiten

    Geen nieuwe activiteiten