Column hindry schoonhoven

Gepubliceerd op 14 juni 2016 | door Jan Glas

1

‘NIMBY’ column van Hindry Schoonhoven

NIMBY

Mit mien bepaarkte ornithologische kennis wis k nog net vast te stellen dat t n blaauwmaiske wezen mos. Dat is, veur elkenain dij noa Fraanze Revoluutsie geboren is en/of Ter Loan nait ien hoes het, n koolmees. Kin ook n pimpelmees west wezen of n aander maark, mor der zat ien aals geval n vogel bie mie achter t hoes. Haail old was e nait. Eerder oetgesproken onvolwazzen, mit zien snoaveltje dij twij moal zo braid was as laank. Zo zain je heur ien EO-documentaires ook aaltied, mit n stuk of wat op rieg ien nust en bek aan oren tou open. Man dij verslag dut vertelt joe, aan zien stem te heuren oet aigen ervoaren, dat ollu der n pìns vol waark aan hebben om heur apmoal genog te vreten te geven. Bie de VARA n pleidooi veur n hoger minimumloon en n nationoale feestdag op ain maai, mor ien dit geval kin k zukswat nait aans beluustern as dat zingeven bestaait oet grootbrengen van zo veul meugelk noageslacht.

n Poar week leden was t leutje koolmeeske bie mie achter t hoes, op initiatief van zien ollu, op wereld zet. Gainain dij hom ooit wat vroagd haar. En nou mos e zain vot te kommen van naauw twinteg vaaierkante meter terrastegels zunder ainege gelegenhaid om bezied te kroepen. Bie elke vogel dij over vloog keek e noar boven en piept’e even. t Kon net zo goud oet angst veur donkere scharen wezen as oet hoop op n redder. k Ston doar mor veur t roam te kieken mit jaas onder aarm, kloar om vot te goan, k wait bie God nait meer woarhìn. Wordt der ien zo’n geval wat van joe verwacht of mouten je natuur zien gang goan loaten? Om de poar menuten, tussen t oetpoesten deur, woagd’e n poging om over mien schutting of over mien schuurtje te vlaigen mor hoger as haalfschaaid kwam e aal nait, mit n nait aal te flewailen aanroaken mit schuttingholt of thermopane as gevolg. t Begon al te twijduustern. As k niks dee din zol e op mien zönneterras zien leste moan zain. k Kon mie nait heugen dat k zulf ooit zo haard vechten most heb as dat meeske. Mit dat k onnaaierd haar dat k wat doun mos kwam vogel recht op mie òf vlaigen om nog net op tied noar rechts òf te boegen en aan aander kaant schutting te lande te kommen.

Man, wat n opluchten! k Heb jaas aantrokken en k bin votgoan, ook al wis ik dat der ien t gankje aan aander kaant schot regelmoateg katten touholden.



One Response to ‘NIMBY’ column van Hindry Schoonhoven

Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

3 × 4 =

Terug naar boven ↑
  • Literatuur activiteiten

    Geen nieuwe activiteiten