Column Jan de Jong, column

Gepubliceerd op 10 mei 2017 | door Webloug

0

‘Nijmoods?’ column van Jan de Jong

Nijmoods?

‘Dat vin ik nou zo mooi an t Grunnegs’, zee Anne Doornbos.
Bie Taol aan taovel ien Vrais. Tegen zoal en mie.
‘In vief woorden t zeggen. Doar hebben wie Drenten tien zinnen veur neudeg.’

Dee mie denken aan hou Grunnegers proaten.
Zollen proaten.
Man ien n Daam mos mit bus. n Dam bus. Zo’n rooie, joa.
Doar nog fietsen boven op zet werden. En kienderwoagens onderien. Opvolden.
En joe mit kop op n glimmende staang vlogen. Van baank veur joe. Bie remmen.
Of mit gat van baank. Over n til.
n Man lopt ziedkaant bus noar sjofeur. Dij draait roamke ommeneden.
Man: ‘Spiek?’
Sjofeur wist: ‘Dij.’

Of, zoas Harry Niehof zee. Bie t Hogelandster dictee.
Hou n Grunneger dut. Noa n vroag. En t mag nait. Of t gaait nait deur.
‘Nou, dìn nàit!’

“Het proaten vaalt ons hail slim stoer,
wie kennen beter zwiegen!” *

Ik lees t verzoameld waark van Pervinzioale Grunneger Schriefwedstried. Vrief bril schoon. Lees vernijs. En nog ais.
Veul, alderduvelst, aibels slimme laange zinnen, doar nooit nait n ènde aan schient te kommen
en k noa n zetje van denk: Mien laive tiedpot nog aan tou, omreden mien opoe zee dat
aaltied as zai t even nait meer wus, woar gaait t wel nait hìn mit ons Grunneger toal?

* Oet: Ons volk is bròkkel. Jan Boer.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

negentien − 9 =

Terug naar boven ↑
  • Literatuur activiteiten

    Geen nieuwe activiteiten