Gepubliceerd op 7 april 2015 | door Jan Glas
Nije Krödde en oproup veur redakteuren en puutholder
De nijste Krödde is oet. Veurien t blad staait n oproup veur nije redakteuren en n puutholder. Tekst is ook hieronder te lezen. Lees t en kiek of t meschain wat veur joe is. Krödde is de ofgelopen 33 joar n belangriek podium west veur begunnende en gevestegde schrievers en dichters. n Literatuurtiedschrift is belangriek veur t Grunnegs en doar as redaksielid of puutholder aan mit te helpen is dankboar waark.
Tiedschrift Krödde zöcht n hoofdredakteur, redakteuren en n puutholder.
Van de redakteuren wordt verwacht dat ze Grunnegs lezen kinnen en ien stoat binnen de teksten op literaire kwaliteiten te beoordailen. Ze huvven zulf gain schriever te wezen, n ervoaren lezer is ook welkom. De redaksie leest kopij en komt 4-6 moal ien t joar soamen om kopij te beoordelen.
De hoofdredakteur en ain van de redakteuren monnen geef Grunnegs schrieven kinnen en genog verstand hemmen van Grunneger spellen om de teksten te corrigeren, laifst ien ale varianten van t Grunnegs.
Hoofdredakteur is indverantwoordelk veur ienhold, opmoak van Krödde en onderholden van contacten mit drukker. Hai beoordailt mit aander redaksieleden kopij, redigeert en corrigeert teksten. Hoofdredacteur koppelt t redactiebesluut over gelezen kopij weerom aan schriever.
Binnen de redaksie worden de volgende toaken verdaild: Kopij administroatsie, opmoak van Krödde, contacten mit drukker en t ienpakken en versturen van Kröddes.
Puutholder dut boukholden en is verantwoordelk veur senterij. Noast t financiëel beheer bestaait zien toak oet t onderholden van t abonneebestand.
As ie mitwaarken willen aan Krödde stuur din n mail aan: info@krodde.nl. Ien de mail geern joen motievoatsie en kennis van t Grunnegs en (Grunneger) literatuur vermelden.
Gerelateerde berichten
Krödde met ‘Schier’ →
Rob R. de Jong houdt Foto-expositie van Grunneger planten in Berlijn →
