Column henk puister, column

Gepubliceerd op 11 augustus 2016 | door Jan Glas

0

‘Nice’ column van Henk Puister

Nice – dunderdag 14 juli 2016

k Zit in zotterdagkraande te lezen. ‘Wie mouten leven leren mit angst’. Tuneziër van ainendaarteg (31) joar huurde n vrachtwoagen, ree volle boulevard van Nice op en gaf gas in minsenmassoa. Hai ston nait bekind as radikoal. Volgens zien buren haar e meer belaang bie salsa en wichter as bie t gebed. Moslim bezat n verbliefsvergunnen. Hai haar financiële perblemen. k Drink van mien swaarde kovvie. As elkenaine mit dikke geldzörgen? Varentachteg (84) minsen overleefden zien aanvaal nait. Honderden gewonden. Hai zol n stil en onvrundelk individu west hebben. As ieder stil mins en ieder onvrundelk mins? Plietsie stopde zien dodenrit deur koegels dij hom nait misden. Voertuug wui deurzeefd. Hai was schaaiden van zien vraauw. Drij kinder haar e. Aarme kinder. Veul lutjen luiten t leven bie d’aanslag. Wat n alderaarmst verdrait. Leste tied was de man agressief en depressief. Zag ik t as kind nait zitten, den troostde mien moeke mit d’woorden: ‘Och, mien jong, mien moe zee vrouger al tegen mie: t Is nooit zo duuster of t wordt aaltied wel weer licht.’

Kovvie gobbelt uut koppie op mien broek. n Lewaai as n oordail. Achter t huus gillen en gilpen kinder. k Leg kraande hèn en goa kieken. Op mien haim om t hörntje van schuurtje verstopt n wichie zok. Vinger op lippen: ‘Meneer, u verraadt me niet, hè.’
Komt n sliere grommen, jonges en wichter, aanbentern deur braandgaange. Ze bölken en bandiezen! Tegelstroatje ligt bezaaid mit gruine bloaden, ofropde stengels van planten en mit swaart zaand.
Och, bezzem der even over en kloar is t.
‘Zummervekaansie?’
‘Jaaahh,’ ropt zo’n bobbeltjesbloasder van n bandiet. ‘Héél lang!’
‘Mooi,’ zeg ik. ‘Speul mor mooi.’

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

5 × 3 =

Terug naar boven ↑
  • Literatuur activiteiten

    Geen nieuwe activiteiten