Column Aly Freije, column

Gepubliceerd op 10 juli 2015 | door Webloug

0

‘New Castle’ column van Aly Freije

New Castle

Mien mobiel ging al vroug òf. n Bekende meldde zuk. ‘As ik die gusteroavend nait zain har zol ik leuven dast in New Castle zitst.’ ‘New Castle, wat mout ik doar?’ ‘Ik krieg n mail dast doar strand bist omdat dien tazze stolen is en doe hest gain geld, paspoort en creditkoart meer om noar d’ambassoade in Londen te raizen.’ Dit ging mie te snel. ‘En of ik doarom 800 euro störten kin en dat leek mie nait goud tou.’ Mie ook nait. t Volgende telefoontje klonk wat grammiedeg. ‘Ik kreeg zo’n roar bericht, ist n virus dij ik nou ook heb?’ Mien adressenbestand was hackt en onverloaten perbaairerden nou overaal geld op te hoalen. Wat zol der van mie docht worden? Bie summege contacten kreeg ik toch wat noare beelden.

Ik mos dij dag beslist n vriendin ophoalen daip Westerwolle in, en doar was ik aigenlieks wel aan tou. Ik kon mien gmail in elk gevaal blokkeren. Mor dou ik in auto zat gingen de smsjes en telefoontjes deur. In d’auto kin je mit Bluetooth handsfree telefoneren. En dat was makkelk, keer op keer rinkelde bèlle de roemte deur. Ik hufde allinneg n knopke op stuur in te drukken en haar contact. Olle bekenden kwammen bie langs, dij k laang nait zain haar. Den mout je, noast t verontschuldegen en t bedanken veur t woarschaauwen, toch ook even vroagen hou t in t leven staait. Bellers haren gain geld overmokt. ‘Doe bist schriever en t is nait dien toon, ’ zee der ain.

Thoes ging ik noar mien inbox. Aal mien mappen en berichtenkopkes waren in t Arabisch omzet. Kwam t van dij kaant? Waren t terroristen, hou ver waren dizze hackers al in mien leven deurdrongen? Zeun beld, dij t apmoal herstellen kon mit n nij account, n hail gedou. Op Facebook meldde ik dat ik nait in New Castle zat. Mensen harren der wel lol in, zoas dat doar gaait. ‘Och ik heb zo mit die te doun en heb 1800 euro stört, mor ast nait in New Castle zitst most mor even terugstörten.’ ’Hest roezie mit dien vraauw, den ist wel hoog oplopen dat zai die niks sturen wil.’
n Dag loater belde n boerin, woar ik wel bekend mit bin. ‘Aly wat was dat toch mit die? Doe wast in New Castle, mit geldverlet, ik wol wel betoalen en heb terug maild houveul geld der din echt neudeg was. Zoveul as joe missen kinnen wast antwoord en dat vertraauwde ik nait. Ik wer wat kwoad en heb dou wat in t Grunnegs schreven. Doar haren ze nait van terug.’

Het ging nog doagen deur. Ook mensen dij k aigengliek niks meer te vertellen haar, kwammen mie wat melden. Zoas M, woarmit ik overhoop lag, ik nam op en wie roakten aan proat.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

7 − 2 =

Terug naar boven ↑
  • Literatuur activiteiten

    Geen nieuwe activiteiten