Column Jan de Jong, column

Gepubliceerd op 17 juni 2015 | door Webloug

0

‘Nait vertraauwd’ column van Jan de Jong

Nait vertraauwd

Oere!
Stoft n ol boas mit n gloependste rötgang bocht om. Hai gniflaagt.
Ik trek hond over n bult en spring mit hom maank stroekerij.
n Fiets mit t ol mìns komt ter achteraan broezen. Mit grode schrikogen en blaik om snoet vlugt wereld aan heur veurbie. Aarms stiefoet aan t stuur.
n Auto remt en toetert.
Man schut zunder op of omkieken stroat over.
Vraauw remt, zet hakken aan grond, stroekelstapt nog wat deur en hangt over t stuur. t Veurwiel tusken bainen.

‘Dij verrekte rötfietsen ook! Elèkriezen.
Loat heur der mor koamervroagen over stellen. n Leeftiedsbepaarken zol nait slim weden.’ Man oet auto is dudelk.

Ons opa was dou dik tachteg en kreeg bain nait meer over fiets. n Minne boudel.
Fiets tegen t schuurtje. Mit n eerabbelkistje der bie wol t net. Even ofzetten en kloar was t. As e mor nait stoppen mos onderwegens.
Hai kwam nogal ais mit n stukkende kop en dikke druppen aan neus op veside.
Weerom lait e hom tegen t schuurtje aan valen.

En nou was hai al drij moal veur t hoes laangs fietst. En mor bellen. Aan stuur hongen lèste twij hounder.
Wie achter t glaas laggen.
Noa vief moal was e t zat en lait hom ien heeg valen. Doar hong e. Bainen staken oet heeg.
Mit veul gepoest en gestìn kreeg moeke hom ien t ìnne. Kop onder schrammen en n winkelhoak ien zien jeske. Vergrèld was e.
Woarom dat ter gainent aan kwam, hom opvangen. Moeke mos baaide hounder ja even veur hom kloarmoaken.

Pa wus road. Opa zien fiets kwam achter ien t schuurtje en votdoadelk op slöt.
Noa n zetje leek zo’n leutje brommertje hom wel makkelk. Dij moggen z’hom wel op joardag geven.
Mooi nait, zeden kiender.
Dou kreeg e opoes ol fiets ien veurkoamer onder t klaid vot.
Buurvraauw zag hom oefen. Autopetten veur t opstappen. Verkeerde bain op trapper. t Aander wol nait tuskendeur.
In ainen was e vot. Buurvraauw op n draf kieken.
Hai hong haalverwege onderwaal, aan t lief tou ien sloot en spottjede as n dikke zeeleeuw.
Opoes fiets kwam ook achter ien schuurtje.

Elekrieze fietsen aan rid bie stroat, mit ol minsen dij mitvoaren.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

twaalf − 6 =

Terug naar boven ↑
  • Literatuur activiteiten

    Geen nieuwe activiteiten