Column Jan de Jong, column

Gepubliceerd op 26 januari 2015 | door Webloug

2

‘Nait vergeten’ column Jan de Jong

Op zo’n dag in haarst krigt twievel geliek. Wereld vergaait n luddek beetje, om t ais te pebaaiern. Druppent gruin. Ons Laimeneer is dizze dag energiezuneg en stroatlanteerns branden van schrik.

t Is veur t eerst dat k hom lopen zai. In n laange, roem bemeten jas. t Is zien bruier, dat kin gewoon nait aans. Carmiggelt. Dij bril. Oetkiek van dörstege dreugte. Der vaalt op dizze wereld niks te lagen. n Haand daip ien buus dij stief n bosschoppenbraifke vaastholdt.

Goa doe mor ais n vrizze neus hoalen het vraauw vast tegen hom roupen. n Pakje botter en edik mitnemen. Aigen maark, denk ter om. Ligt n braifke kloar op t aanrecht. Hond nait vergeten. En der nait votdoadelk weer weden.

Allinneg n vraauw ien soepadvertentsies vien t aal doag schier as heur kerel thoes komt docht e nog even dou e deur oet stapte.

n Laange raim sleept over stroat. Aan t ende stapt n truitje doar n luddek hertje ien zit. Bibbernd bogt Bambi rug. Hai blift stoan. t Is goud tegen baisten te proaten. Zai zeggen niks weerom en vienden ales goud. t Duurt eefkes. Ik krieg der glad pien ien t lief van. Bambi wupt aalgedureg wat mit t gat. Hai blift net ien de bainen. Zien ogen goan lös en zai kieken nkander aan. Din lopen zai wieder. Ik tel. Drij haarde knikkers. Ik kin dat. Wit stoet en eerste doagen van vekaanzie.

Even wieder stap ik in supermaart en pak n mandje. Dommee mor even kieken bie t café om houk. Doar zitten zai vast mit n baaident achter t glaas. Hai achter zo’n luddek helder glaske en Bambi op stoul noast hom.

Hè, wat mos k nou hebben. Ik zet t mandje ien aander mandjes veur kassa en loop supermaart weer oet. Aarns best wel handeg, zo’n braifke.

Tags: , ,



2 Responses to ‘Nait vergeten’ column Jan de Jong

Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

elf − 9 =

Terug naar boven ↑
  • Literatuur activiteiten

    Geen nieuwe activiteiten