Column Chris Kiel, column

Gepubliceerd op 30 oktober 2015 | door Webloug

1

‘Nait van zunneboaden’ column van Chris Kiel

Nait van zunneboaden

Deur Noordwest-Grönnen ree ik. In d’auto. Mien vraauw har k ofzet bie Verhildersum. Doar har ze wat belangrieks te doun. Historische doagen harren ze doar, al was t nog lang gain Moand van de Geschiedenis.
Of t in Lains, of Ulrum was, bin k vergeten. Is ook nait belangriek. k Kwam doar langs n bushalte. n Onbelangrieke.
Doar ston n wichtje. Of n jonge vraauw. Misschien allerdeegs n nait meer jonge vraauw. Zo goud heb k nait keken, t was ja nog n onbelangrieke vraauw veur mie, dus woarom zol ik kieken wat veur n soort vraauw dat was.
En dou bewoog ze heur bainen en inains zag ik dij bainen. Op dat moment wör dij vraauw belangriek. En allerdeegs dij bushalte.
t Warren vrij lange, slanke bainen en ze warren broen, zo donker broen dat t nait van zunneboaden kommen kon. Dij bainen warren nait van hier dus, mor dat was nait belangriek. Van belang was allain dat ze der warren, dij bainen en dat ze bewogen.
Muik t wicht n poar danspasjes? Ik wait nait, ik heb gain verstand van dansen, van bainen of van bainbewegens. Mor ik wait wat mooi is, en as ik dat begun augustus nog nait waiten har, har ik t dou in ain klap leerd. n Ondailboar ogenblik heb k t zain, dou was t veurbie, dij bushalte, dij vraauw en dij bainen.
k Zat in auto ja en ik bin der de man nait noar om bie n bushalte stoan te blieven en te kieken.
As ik der aan truggedenk, spiet mie t wel es, dat k nait remd heb om langer te kieken.
‘Tussen dreum en doad… ’ (Mor k wol gainent doodhaauwen, doar loater n keer over.)
Oeteindelk denk ik, dat t goud is zo.
‘A thing of beauty…’ Keats.
Ook as t n moment is.
Langer kieken har t misschien veur altied bedurven. Wel wait, har ze t volgende moment heur neuze oetsnoven, net as de Arlésienne dij Max Havelaar zain har en misschien was dat aiwege moment den veurgoud verprutst.
Nou is t filmpje onbeschoadegd.

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , ,



One Response to ‘Nait van zunneboaden’ column van Chris Kiel

  1. Chris, wat weer n aibels mooi verhoal, zo lekker kört en alles stait ter in !

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

1 × 1 =

Terug naar boven ↑
  • Literatuur activiteiten

    Geen nieuwe activiteiten