Column Jan de Jong, column

Gepubliceerd op 8 juni 2017 | door Webloug

0

‘Nait om liek’ column van Jan de Jong

Nait om liek

Drij moal doags loop k mit ons hond. n Leutje. Veur te schieten en te miegen, zo as
dat ien netjes Grunnegs hait.
Al jeuken oren mie no nog, van as k dat vrouger weer ais n moal zeggen duurde.
Vraauw lopt t lèste rondje mit hom. Din mout e poepen en plazzen.

Hond blift mainsttied stoan bie t schoulplaain. Kieken. Noar kiender van groep ain of twij.
‘Dat is geen klas opa’, zee klaaindochter. Ik leer nog aal doag bie.
Muid, slim muid word k doar van, van dat kieken. Runnen, droaven, mit n touw, n baal, trapkaren,
slepen mit planken, schommeln en fietsen. En aal geluud dat doar bie neudeg is.
Drij juvven der maank. Dij maggen din eefkes oetpoesten en hebben heur pauze.

n Jonkje staait wat ampaart en dut scholders op en deel geliek mit stampen van n voutje.
Drij aandern stoan n èndje van hom òf en kniezen.
Komt n juf. n Zaachte, laive, ducht mie. Of t mout weden dat k no aans noar juvven kiek.
‘Mag hij niet meedoen?’
Kiek, dat vien k mooi. Nait votdoadelk stief bie aarms kriegen. En zo te heuren wait ze dat kiender nait doof binnen. Al is haardheurend bie heur nog wel ais nait vremd vanzulf.
Nee. Hai wil altied zien zin en luustert toch nait, heur k.
Juf holdt kop schaif: ‘Echt niet? Willen we het óók niet proberen?’
Jonkjes kieken nkander aan. Nee.
D’aander stampvout nog ais en lopt noar zandbak. Hai gaait zitten op raand, rug noar heur
tou. Kikt nog n moal om en krigt hom wat oet buus.

Weer thoes lees ik n tweet.
“Zojuist informateur Schippers gesproken. Hier mijn advies aan haar.”
Ik krieg mie n kovvie.
Kleuters. Kop kin je der wel bie omlopen.

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

twaalf + 14 =

Terug naar boven ↑
  • Literatuur activiteiten

    Geen nieuwe activiteiten