Column Jan de Jong, column

Gepubliceerd op 10 juni 2015 | door Webloug

0

’n Wolk’ column van Jan de Jong

n Wolk

‘Wat n lul!’

Verschrikt kikt zai mie aan.
Mien wenkbraauwen en haand goan omhoog. k Dou doem en wiesvinger van nkander en n moal of wat hinneweer.
Heur vriendin komt nait meer bie. Mit koppen as robaiten boegen zai noar nkander tou.

Twij wichter van om en bie datteg. Noast nkander aan grode toavel ien bibeltaik.

Ik zet oren op steeltjes. Over mien blad zai k heur nog n moal of wat noar mie gloepen.

Volumeknop gaait vernijs omhoog. Ik goa der makkelk bie zitten.
‘Wat duren twij menuten din laank. Ston n pluske op t stoafke van test. Ik janken en daanzen touglieks.
k Heb ons geliek wat lekkers hoald. Dou heb k t hail hoes aan kaant moakt. Eefkes lekker doezen en wel n haalf uur veur spaigel stoan draaien. Volgens mie kin je t al zain. Ie veraandern votdoadelk volgens mie.’
Heur gezicht is ain en aal zunschien en vriendin denkt t ook.
‘k Heb eefkes goud mien bèst doan en lekker eten moakt. n Bloumke mit keerskes op toavel en der n extroa leutje bordje bie dekt.
Hai keek swaart dou e der ien kwam. Wat dit wel nait was. Roaden zee ik. Dat wie toch gain veside kregen wel? Hai wees op t bordje.
Joa, zee ik, komt dommee ain miteten. Hai wèr mie toch vranterg!
k Bin ien verwachten heb k dou mor zegd. Hai ston der bie of e ien boksem scheten haar. Ong? Was eefkes n doavernde stilte.
Mooi, kieken wie zodderdag geliek noar n groder auto zee e. Ik kon hom wel vergraimen!’

Ik kin min leed aanheuren. As k bie heur laangs loop filesetaaier k heur. Baaident mouten laggen.
Liggen bouken over potjes. Bovenop ligt ‘Negen maanden blij.’
Nait doun zeg k tegen miezulf. Nait doun mien jong.

Potjes.

Was n bruiertje geboren.
Ik mos mit pa en opa en oma mit noar sloapkoamer. Pa dee t loakentje ien waig n èndje aan zied.
‘Wat n mooi potje,’ zee oma en dee n vinger ien zien knoestje.
‘Joa,’ zee moeke oet t bèr. ‘Krekt n vild knien.’

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

twintig − 8 =

Terug naar boven ↑
  • Literatuur activiteiten

    Geen nieuwe activiteiten