Column Jan de Jong, column

Gepubliceerd op 8 augustus 2015 | door Webloug

0

’n Swieneboudel’ column van Jan de Jong

n Swieneboudel

t Leutje wicht knuvvelt t swientje en holdt hom stief vaast. Baaide snoetjes snoeven eefkes aan nkander. ‘Lief hè mam? Ik vind hem zó lief.’
Moeke bogt heur ien gedachten veurover en kroelt ol swien achter ien nek. ‘Ja lief,’ zegt zai zaacht en zucht. As zai mie aankikt twievelt zai even, mor zegt niks.
Komt nog n moeke mit n jonkje.
‘Mag ik ook zo’n varkentje mam?’
Zien moeke gript ook ain oet t hok en t jonkje krigt hom op aarm. ‘Aandoenlijk,’ zegt zai en strikt ol swien over rug.
Vraauwlu kieken nkander aan en swiegen.

Kienderboerderij. Daaier, laif en aaiboar.

As moekes vot binnen striek ik ol mot achter kop. Ol knort en nuzzelt heur tevreden op zied. Leutjekes schoereln stief tegen heur aan en drinken.
n Klaain wotterg oogje kikt mie aan, dwaars deur mie hìn. Bekropt mie n schuldgevuil.
Zo’n socioal en klouk daaier. Groot en best wel guteg. Mor ook staark en aigenzinneg. n Bliedeg, traauw daaier dij van mìnsen holdt.

Wat heb ik toch mit swienen.

Swienen, miljounen leven n verbörgen bestoan ien hightech gebaauwen.
Votstopt. Zo wied meugelk oet t zigt.

Hangt n pepier op n prikbord.
“Wilde zwijnen eisen steeds meer leefruimte op”, staait ter boven.
“Everzwijnen moeten buiten de verboden gebieden meer ruimte hebben, want veel recreanten zouden best een zwijn in het bos willen zien.”

Zai mouten roemte kriegen deur ons hail laand, staait ter. Steeën aanwiezen doar zai scharreln maggen. En ook doar zai náit kommen maggen. Omreden schoa.
Aanriedingen kosten no al twij miljoun. En vrutten ien akkers, voetbaalvelden en golfboanen kost al om en bie n haalf miljoun.
“De onderzoekers willen daarom dat een vorm van de nu verboden drukjacht in Nederland weer wordt toegestaan. Zo kunnen grote groepen zwijnen snel
worden afgemaakt. Dat is beter voor de rust van de dieren die achterblijven.”

Ik wil noar boeten.

Mit n knup ien moag fiets k noar hoes.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

3 × 4 =

Terug naar boven ↑
  • Literatuur activiteiten

    Geen nieuwe activiteiten