Column Jan de Jong, column

Gepubliceerd op 12 oktober 2015 | door Webloug

3

’n Strontproatje’ column van Jan de Jong

n Strontproatje

n Wielrenner ien d’Amerikoanse stoat Idaho het van t zummer n bos ien de fik stoken. Oere, n male grap.
Hai mos vrezelk neudeg oet de boksem en omreden hai t millieu nait vervoelen wol het e t schietpepier
ien braand stoken. Ook t dreuge gras wol goud branden.

Datteg bunder noatuur noar zien grootje. Noa zeuven uur bluzzen haar brandweer t vuur onder controle. Fietser het hom zulf aangeven.

t Klopt mit “bewieslast” op t stee volgens woordvoerder van brandweer.

k Mos eefkes aan toen van opa oet Daam denken. Doar fladderde bie toeren ook pepier rond. Reepkes Margriet, Elizabeth bode en t kerkbladje. Hai wol ons din nait op toen hebben.
Nou, hai huifde nait baang weden. Hong n dikke strontlucht en dat pepier konden wie wel. Reepkes dij oma scheurd haar. n Stoapeltje mit n endje goaren der deur en din aan spieker ien t hoeske.

Ik mog geern Broer Konijn lezen as k doar zat. Allinneg t verhoal was nooit kepleet. En t pepier veulste glad. n Dikke smeerderij.

Bie winterdag mos tun eerst op t petreuliestel. Hail boudel was vroren.

Opa haar beste gruinten.

Dou bruiertje n moal aan toavel vroug of zuske ien boksem scheten haar en elk begon te snoeven kreeg moeke vergrèld paan van toavel en moggen wie appelmoes.
Nooit gain praai van opa meer.

Ien Daam hillen zai ook tunnen leeg mit n pladde proam deur Damsterdaip. Aan achterkaant hoezen. Twij dikke kerels dij eerst op deur van t hoeske klopten of der ook ain op zat. Din tun aan achterkaant der oet en ien proam leegsmeten. As proam vol was mozzen zai hom even boeten Daam op n stuk laand leegscheppen. Mit n putemmer aan n hail laange stok. Min waark en mannen haren doar n gloependste hekel aan.

Mor zai haren der wat op vonden dat proam nait te gaauw vol was.
Tun op raand van proam, n blode aarm der veur en dunste der over lopen loaten ien daip.
Scheelt zeker n haalve tun. Allinneg dikste ien proam.

Zo, hebben wie t strontproatje ook weer had.

Tags: , ,



3 Responses to ’n Strontproatje’ column van Jan de Jong

Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

3 × drie =

Terug naar boven ↑
  • Literatuur activiteiten

    Geen nieuwe activiteiten