Column Jan de Jong, column

Gepubliceerd op 30 maart 2015 | door Webloug

0

’n Rustdag’ column van Jan de Jong

n Rustdag

n Koale boom staait allinneg te weden. Aalderwegens fiene drupkes. End feberwoarie.
t Is nog vroug. Stilte van n vrizze dag. Wereld is nog nait wakker.

Laimeneer was kloar. Zes doag stief aan t waark west. Oetpoesten. n Zundag.
Ik zet gat op baank en kiek oet t glaas. Vremd. Naargens nait n vogel te zain.

Verkeerde verwachten. Doar kinnen ie n levent laank last van hebben. Ien jeugd al begund.
Eva mos n toenboksem aan en kreeg okselhoar. En zai was Oadams gesnurk stinzat. Der mos n aigen sloapkoamer kommen.
Kaïn sloug Oabel harstikke dood. Van pesten en ADHD wuzzen zai dou nog nait.
Sunnerkloas zol ook nait bestoan.
En dou pa smirregs sleudel ien veurdeur stak, dou hai mit moeke, bruiertjes en zuskes weerom kwam van wandeln haar e t al heurd. Hou k wel nait duurde. n Blokje fietsen. En nog wel ien mien zundoagse goud. Votdoadelk noar ber. Zunder eten.

Op ber, mit n bouk van Arendsoog en ain van boerenoorlog ien Oafrikoa smikkelde ik n dikke abbel op en hapte tuskendeur van n dreuge kap stoet. Dij kon k nog net oet t schilbakje griepen. t Aander kapke luit k veur t knien.
Beneden heurde k roezie kribben. Achter aan toavel. Sauskes doppen en spoetnik.

t Is dreug. Vlaigen twij kauwtjes ien boom. Zai schoerelt tegen hom aan. Zachtjes pikt e wat veertjes bie heur op t stee. Din soezeln zai wat.

Klap klap. n Holtdoef, heur aigen, eefkes n stukje omhoog glidt deur lucht omdeel op n tak en schudt hom zien dekber op. Din knipt e oogjes dicht.
Kauwtjes goan verzitten en kieken schuuns ommeneden. Vernijs schoereln zai stief tegen nkander aan.

Vanoet naargens vaalt n kraai en schraauwt. Gript doef bie haals. Vleugels klappen. Kauwtjes naaien der oet.
Langsoam dwarreln veren deel.
Din wupt e van tak noar tak. Aal hoger. Boven ien boom rekt hai hom oet en kikt over kontraain.
Strekt hom vleugels en bogt daip en krast, dut kop op en deel en krast, en krast.

Ik kom ien de bainen. Kovvie.
Verkeerde verwachten kinnen gevoarlek weden.
Bestaait e wel ècht?

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

4 × drie =

Terug naar boven ↑
  • Literatuur activiteiten

    Geen nieuwe activiteiten