Column Jan de Jong, column

Gepubliceerd op 16 februari 2015 | door Webloug

0

’n Heks’ column van Jan de Jong

n Heks

Ik dreudel weer ais maank apmoal kerstbomen.

n Boom kwam der nait ien bie heur. Chrisje. n Luddek laif wichtje. n Scharreltje van vrouger. Ien n cape mit capuchon sweefde zai deur t leven. Ales aan heur was swaart. Echt, ales. Zai woonde al op koamers en hil van mie en van bomen en katten, vief en ook van Boeddha.

Op mien joardag kwam zai veur eerste moal bie ons thoes. Oavends loat. Tied dat dörst aal groder wuir en proaterij veur doven al begunt. Ik kreeg n riezen bezzem mit laange stoal. Monden villen lös. Zuskes en moeke gaauw noar keuken. t Geluud van segoaresmook mit wierook en Chrisje ien koamer.

k Mos n winterse oavend veur eerste kerstdag sloapen blieven en aanderdoags bie lichten mit. Bomen knuvveln. Leventege bomen.

Vervroren stroekelde k ien n duuster bos dikke bomen. Dij wazzen t beste. Aandern pruiten tegen gaisten en slougen aarms bliedeg om bomen. Aal laifde en t vuilen van kosmos. Op n bankje mos k stìnverkleumd op zuik noar mien handen en vouten. Chrisje kreeg gain genog van n aik. Noatied mos wie zingen. Ik doar vrezelk om lagen en loater op dag van dokter n week thoes blieven mit griep. Ik mog nog van geluk proaten zee Chrisje.

k Heb t nog ain moal pebaaierd. Op zo’n dag, dat ol opas mit blaike baintjes in n laange körte boksem noar schaar zuiken onder n witte slagerspet en opoes nait baang binnen veur tocht en wiedbains onder n parasol zitten.

Mit hond noar t plantsoen.

Doar ston e. Almeugend stil sluig k aarms om hom tou. Eerst zachtjes proaten. t Waarkte. Aal energie. Chrisje bèlkte k ien t lest. Chrisje!

Hond ston mit n plougje volk op ofstand te kieken. Ie heuren ja zukke vremde dingen tegenswoardeg.

Aalgedureg vuil k eefkes en striek heur zachtjes. Wat nou?

Vernijs n geboortefeest mit t krubke onder n boom dij al oet tied kommen is? Vermoord?

Of ain mit n kloet? Dij langsoam krepeert?

 

Bio Jan de Jong

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

vier × 4 =

Terug naar boven ↑
  • Literatuur activiteiten

    Geen nieuwe activiteiten