Column Fieke Gosselaar, column

Gepubliceerd op 6 februari 2015 | door Webloug

3

’n Haalf joar laank’ column van Fieke Gosselaar

n Haalf joar laank (moar zeker nait meer den ain dag per moand) in t aarmste dörp van Nederland.

t Was n journalistiek experiment, mor n hoes huren in Pekel bleek meer n marketingtruuk veur t programma. t Klinkt goud. Kiek, zeden ze, wie mit onze getrimde boardjes duurven in t gevoarleke, hoogst criminele Pekel te wonen. Der wonen allinneg moar roare minsen, zo roar, dat kinnen wie ons hier in t Westen nait veurstellen, hier woar alle beschoafde minsen wonen. Minsen dij nait zeggen dat ze laiver n oetkeren hebben den waarken, dat ze op belastingcenten van aandern teren. Minsen dij nait tougeven dat ze lui worden van t niks doun of dij misschain wel stiekem alcoholist binnen. Of minsen dij zeggen dat voetbalschounen te duur binnen. Dij binnen der nait in t Westen. Nee, dij binnen allinneg mor in Pekel. Allinneg mor tegen de grins van Duutslaand aan. Vraauw van stichting Gezinshulp zee t zulf ja. Van vrouger oet wonen hier malloten, dij kwamen hier noa Franse Oorlog oet de steden. Alle paupers kwamen hier in t gesticht en gingen hier nooit weer weg. Deur inteelt binnen wie Grunnegers (en Drenthen nuimde ze der ook bie) nou wat wie binnen: stelletje paupers. Dat wie nait aalmoal scheel oet onze ogen kieken, mag nog n wonder wezen.

‘Hou is dat nou om boeten te lopen mit dien hondje? Komst ook n moal boeten zo, van baank òf?’

‘Nee, doe wilst in Pekel blieven? Dat vertoal ik dus zo dat astoe waark vinden kinst, ain kilometer boeten t dörp, doe dat nait wilst? Joa?’

‘Ah, t is twaalf uur en nou al aan t bier? Lekker? Joa?’

‘Bist zaik? Mor kinst wel waarken toch? Joa he? Joa toch?’

Bie Evangelische Omroup nuimen ze dat experimentele journalistiek. Ik vin t eerder suggestief, mor ja, ik kom oet Finnerwold en dat is vast nait beter as Pekel in de ogen van ambitieuze journalisten mit getrimde boardjes dij in n gespraaid bedje ter wereld kwamen. In elk geval nait in Pekel. Ze motten der nait aan denken, aal dij gekke minsen hier, achtergesteld gebied. Mooie documentaires kin je der wel over moaken, t is hier zo aans. Mit heur vrumde toaltje, ondertiteling dut t ook altied goud. Even in kroug kieken of doar dronken minsen zitten. Worden we doar wegstuurd! Roare minsen dij Pekelders.

Fieke leest HIER de column veur op Radio Noord.

(Foto © Jan Glas)

Tags: , ,



3 Responses to ’n Haalf joar laank’ column van Fieke Gosselaar

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

12 + 14 =

Terug naar boven ↑
  • Literatuur activiteiten

    Geen nieuwe activiteiten