Column Tonko Ufkes, column, goed lek

Gepubliceerd op 26 februari 2015 | door Webloug

0

’n Dubbele paraplu’ column van Tonko Ufkes

n Dubbele paraplu

As lesten warren we kloar met t tentoamen en zodoende liepen we host toegelieks de Lutke Nijstroat ien, onderweegs noar huus. Zij zag der prachteg uut, hielendal ien t rood en ze har zulfs n rood parapluutje opstoken tegen de begunnende regen. Zulf klapte ik n old, swaart ding open. En misschien omdat t ofslutende tentoamen zo goed goan waas, of omdat nou t vekaansie wer: ien n vloag van dapperheid vroeg ik heur zomor of ze nog eefkes metging, wat drinken. Zij von t best en we liepen steveg deur de tikkende regen noar mien koamer, vlakbij.

t Wer n mooie middag en noa de thee kwam de wien, kwam stokbrood met kees en aander lekkers wat ik nog ien e keuken von. Ondertied golfde de regen laangs t roam, mor binnen wer t aal waarmer en gezelleger.

Ien boeten waas t ientussen duuster worden, binnen dee de wien zien waark en met die iendronken moed besloot ik deur te pakken: ik bedocht om beide paraplu’s te verstoppen, zodat mien joargenote en ik eileks niet meer deur de regen konden.

Mor toen ik – onderweegs noar de wc – gaauw op zuuk ging, hingen ze spieteg genogt niet an de kapstok en k zag ze ok nargens aans ien e gaang.

Op aanwiezeng van mien joargenote von k eerst aanderdoagsmörns beide paraplu’s weerom, sjompenat en ien nkander schoven laggen ze noast t huus. Lachend wer opbiecht dat zij beide paraplu’s deur t WC-roamke noar boeten mikt har, om te veurkommen dat zij misschien toch nog oavends loat deur de stromende regen noar huus toe mos.

Dat dizze vraauw op t juuste mement deurtastend waas, har k gelukkeg al vernommen.

Tags: ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

9 + 1 =

Terug naar boven ↑
  • Literatuur activiteiten

    Geen nieuwe activiteiten