Column column jan glas

Gepubliceerd op 1 april 2015 | door Jan Glas

0

’n Aachtste sekonde mor’ column van Jan Glas

n Aachtste sekonde mor

t Is mie verdorie weer overkommen! Ik kwam veur informoatsie. t Wicht achter buro haar n daip decolleté en teunde n veurroad om groots op te wezen, woar mien ogen meschain n aachtste sekonde noar keken, eer ik noar heur keek. Mor zai haar t deur en legde vot hail discreet n vlakke haand op heur pronk.
Ik keek nait. Mien ogen keken! Ien n soort van remsloapreflex. k Heb der gain controle over.
Mit mien ogen strak op heur veurheufd richt koakelde ik deur over dit en dat, laanger as neudeg, omdat ik hoop dat t din oetindelk n hail gewoon gesprek wordt, mit dij aine, ongemakkelke aachtste seconde, dij ien de lengte van t gesprek gain noam meer hemmen mag. Mor deur dat gebabbel wordt veuraal dij aachtste seconde aalsmor laanger.

n Keer mos ik mie melden bie n balie en wer ophoald deur n wichtje van begun twinneg, zai mos mie noar plek van ofsproak brengen. n Luk wichtje. Zai haar n enorme boezem, opdrukt tot zowat onder heur kin. Kin ik der wat aan doun? Weer dij aachtste seconde! Heur holden wer vot ofstandelk. Wie mozzen soamen ook nog ais ien n haile klaaine lift. k Vuilde mie slim opgeloaten. t Wicht ook; onderhand haar zai heur aarms over mekoar sloagen en dij boven op de blikvangers stoapeld. Ik ging mit rug der noartou stoan. k Docht nog: zel k, om heur gerust te stellen, zeggen dat ik homo bin? Mor wat veur onneuzele situoatsie kriegen je din. Wat mot zai doar op zeggen? n Wildvrumde kerel, dij mit rug noar heur tou, ien n haile klaaine lift, oet t niks, zien seksuele veurkeur opbiecht. Da’s nait fris.

‘O, mor ik heb persies hetzulfde bie vraauwen mit dikke titten,’ zee lest n heterovriendin tegen mie.’ Goud om te heuren dat ik nait de ainege bin. Mor t verzaacht zo’n male aachtste sekonde nait.

Tiedens signeren. n Oldere, rejoal bedailde vraauw, bogt veurover: ‘Ik vien joen gedichten zó mooi.’ Ik kiek op. Mor veur mien blik dij van heur treft is der dij aachtste sekonde. Leeftied speult gain rol. Ik hoop mor dat ze domment ‘De mooie bakker’ as eerste lezen zel. Of ‘Blonde knecht’.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

vier × een =

Terug naar boven ↑
  • Literatuur activiteiten

    Geen nieuwe activiteiten