Muziek

Gepubliceerd op 11 december 2012 | door Webloug

0

Muziekliest Twij Deuntjes veur Ain Cent (week 51)


Dizze weke stoan we wat meer din uutgebraaid stil bie Cornelis Vreeswijk. t Geval wil dat t 30 joar heer is dat zien allerleste nederlandstoalege lp ‘Balladen van de Gewapende Bedelaar’ verschenen is. t Was aargenswoar in november 1982 dou der n optreden van hom in de Muzeval in Emmen was. Elk het wel ais van dij momenten, dij e noeit licht vergeten zel en der din ook nog van zeggen kin ‘Ik was der dou ook bie’. Kees (Cornelis) was dou op toer om zien nije ploade te permoten en ik kin mit recht zeggen, hai was dou op zien alerbest. t Pebliek in Emmen zat moesstil noar hom te lustern en bie zetten har t ook wat magisch in zuk. Cornelis n man mit n innemende lach mit charisma en mit schaarbe opmaarkens en biebeheurende teksten. Hier ston n man dij ons wat te zeggen har. Hai nam dudelk gain blad veur de mond. Hier ston ain van de belangriekste dichters van Zweden veur ons. Drij joar loater was e in inainen ook in novembermoand in Stad Grunnen om op te treden in Huize Maas en t was op dij oavend, veur n veuls te klain pebliek , onuutwisboar grandioos. Hai was dou 48 joar en kwam al wat broos over, mor zien striedboarhaid was der nait minder om. t Waren gain laidjes veur broave lu, mor bie zetten spiekerhaard en din ook weer hail septiel veur t gemoud. Ik kon dou nait bedenken dat t veur mie de leste keer wezen zol. Twij joar loater op 12 november 1987 nog mor viefteg joar old kwam dizze grode man uut tied. Muziekliest is HIER te lezen. Oetzendens elke waarkdag 18:00 – 19:00 uur.

Tags:



Reacties zijn gesloten

Terug naar boven ↑
  • Muziek activiteiten

    Geen nieuwe activiteiten