Column column jan glas

Gepubliceerd op 22 april 2015 | door Webloug

0

‘Moaden kweken’ column van Jan Glas

Moaden kweken

t Is veujoar. Op ain van de eerste waarme doagen verleden week fietse ik deur Stad mit handsen aan, sjaal om en muts op kop en veur de goegemainte onzichtboar, ook nog n laang onderboksum. Want doar sweer ik bie; laang ondergoud ien winter. En ook al hemmen wie diskeer weer gain winter had, ien winter hemmen je ien Noord Europa laang ondergoud aan. Punt. Scheelt joe ook nog ais ien de stookkosten.

Doar fietste ik dus, om mie tou apmoal lu ien korde broek, rokjes, zummerklaidjes en T-shirts van pluk dizze mooie dag. k Wer ien Bodderstroat nog groet deur n bekende Grunneger cabaretière, comediante en zangeres ien n fleureg klaidje. Zel wel docht hemmen: het dij lamstroal aal t wintergoud nog aan! Vast nait, mor zo zai ik mien waarm iengestopte zulf din: n verzichteg man; eerst t veujoar mor even aankieken, zo waarm as t nou al is zol t aiglieks nog nait wezen monnen. t Mooie weer kin zomor weer omsloagen. As ik din mor laang genog deur prakkezaaier kom k oetindelk vanzulf bie n zekere levensangst oet.

‘Bis aan t moaden kweken?’ zee mien moe ais tegen mie toun ik ien n veujoar mit dikke winterjas nog aan bie heur op bezuik kwam.

Dat wintergoud mot op n dag kaast weer ien. Dij beslizzen neemt elk. Mor hou groot en overheersend is t aandail van t nemen van dat soort beslizzens ien joen doagelks denken? Ik was zo rond de twinneg dou ik heurde dat ain n ind aan zien leven moakt haar, ien n braif dij e achterloaten haar ston dat hai de doagelkse beslizzens nait meer nemen wol. t Waren hom te veul. Beslizzens woar handelingen op volgen monnen: opstoan, doezen of nait, tanden bozzeln, ofdreugen, goud aan, knopen en ritsen, veders knuppen, wat op brood te doun, op pad goan, jas aan, knopen dicht, mot muts op, handsen of nait. Koken, ofspoulen, ofwassen, ofdreugen, oproemen, even weg, jas aan, rits dicht, fietssleudel mit, knip mit, fiets tou schuurke oet, deur van schuurke dicht en op slöt… Hail dag deur beslizzens. Handelingen doun. Hai wol t nait meer, kwam meschain nait meer veurbie dij handelingen. Ik was toun jong en k begreep t nait recht. t Maik wel grode iendruk op mie. Hou older ik wor hou meer ik mie bewust bin van aal dij doagelkse handelingen. t Liekt ook net of der mit t older worden aal meer doagelkse handelingen bie kommen.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

1 + een =

Terug naar boven ↑
  • Literatuur activiteiten

    Geen nieuwe activiteiten