Column Jan de Jong, column

Gepubliceerd op 14 april 2016 | door Webloug

1

‘Mishemmen’ column van Jan de jong

Mishemmen

Hai sjokte n endje wieder veur mie aan op t fietspad. Baaide handen aan elbogen tou ien buus. Ain
kaant stekt n oor, mit n plaaister aan kop bakt, oet n boetenmedel fosse gries hoar.
Zo’n anderhaalf meter achter hom n vraauw. n Leutje koedeltje. Koggelnd en kop rood. Onder n zundoags permanentje binzeln stokbaintjes ien steunkouzen oet n grieze mandel. ‘Loop toch nait aal
zo haard!’
Zo t liekt ligt t geheurapperoatje nog op toavel, bie scheer.
‘Kom, dat ding oet t oor.’ Zai zellen heur doar n beetje gek weden. Derkje kin hom zulf nog wel t hoar doun. Wat kost dat aans wel nait. Bie geluk lag der nog leukoplast ien keukenloa.
‘Hinderk! Hest mie ook heurd?’
Hai krimpt ien nkander. Kop tusken scholders.
‘Woarom hest dij olle jes nò weer aan. k Haar die nog zo zegd.’

Joen olle dag. Zo t rekent al zesteg joar traauwd. Vervast n dikke bruloft had mit n stuk ien t
bokkeblad. “Wat t gehaaim is van n goud huwelk” boven t petret, doar Derkje noast Hinderk zit en hom stief bie haand holdt. En Hinderk mit verwachtensvolle oetkiek noar zien twij klokjes mit sukker dij e vandoag hemmen mag. Nait meer hur, t is vanzulf gain opmoakersboudel.

‘Nee. Bistoe gek?’ Vraauw is dudelk.
Mit leeftiedsontslag. k Haar docht dat wie meschain nog wel ain moal vervoaren konden. Noar t Hogelaand. De klaai op. Roemte. Vrizze lucht.
Vraauw is nait oet klaai wozzen. n Drentie. Törf, jannever en achterdocht duur k bie zetten wel ais zachies fluustern. Gain komvol kovvie, nee, n koppie en n schurrelie mit n lepelie.
En t Grunnegerlaand? Niks der van. Het tocht heur doar te bot. Vergeet t mor.

Nò loop k aal mörns vro bie t pad. Om en bie zes uur. Mit mien dikke kammeroad, Gijsje. Laangs ‘de Drentse dreven’ van aal rijtjeswonens bie ons ien wiek.
Gedachten bie roek van t gruinlaand, of achter diek.
Kieken of buurman, van n endje wiederop der ook lopt. Mit zien dikke Berner Sennen hond. Hai komt ook van klaai òf. Haitied eefkes n luddek proatje. Ien ons moekes toal.
Begunt mien dag op t Drenthelaand ien aal geval goud.

Tags: , ,



One Response to ‘Mishemmen’ column van Jan de jong

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

17 − zestien =

Terug naar boven ↑
  • Literatuur activiteiten

    Geen nieuwe activiteiten