Column Tonko Ufkes, column, goed lek

Gepubliceerd op 20 juli 2015 | door Webloug

0

‘Mien eerste (tzatziki)’ column van Tonko Ufkes

Mien eerste (tzatziki)        

t Gebeurde ien e zummer van 1978, mien eerste zummer as student ien Stad. Waarm waas t, om meer as één reden, mor n ervoaren joargenote wis gelukkeg woar echte studenten òfkoelden. Staarker nog, zij waas der zulfs al n moal west: de Hoornse Plas.

Zulfverzekerd hoalde ze mij op en soamen fietsten we die zotterdag noar t zuden, gewoon de Paterswoldseweg del en zunder problemen vonden we t wereldberoemde wotter. De fietsen kwammen op slöt, de taas met ons zwemkleren dee ik lös over mien scholder en zo liepen we rond. Veur t eerst haand ien haand; t zol vast n mooie middag worden.
We kwammen noa n verkeerde bocht ieneent te lande op t noakstraand, noar loater bleek veur ons beiden onbekend terrein, mor vanzulf lieten we dat beiden niet blieken. Of t zo òfproat waas, visten we allent e twee badloakens uut e taas, kleedden ons dapper hielendal uut en gingen gaauw op t lief leggen. Gaauwachteg vuulde ik de zun fel op mien billen branden en zag dat ok bij de ervoaren joargenote noast me, krekt doar het wit van kleur verschoot. Eileks zollen we nou nkander op dat plak iensmeren moeten, of aans omdraaien en op e rug leggen goan. Wij duurden en deden t beiden niet.

Met n woest brandend achterste fietsten we an t end van e middag weerom noar mien koamer. Zunder te bewegen begonnen we an t stokbrood met salade tot we ien t lest toegelieks opbiechtten dat stoan of leggen ons toch echt e beste holdeng leek.

Weer kleedden we ons dapper hielendal uut en hemmen veurzichte om en om schiefkes komkommer op mekoars roodgluiende billen lijd. Noa de salade kreeg ok het toetje n veul betere bestemmeng en e zaacht delvlijde yoghurt tussen de komkommerschiefkes koelde best.
Vannijs noast nkander op t lief, vielen we gelukkeg ien sloap.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

19 − vijf =

Terug naar boven ↑
  • Literatuur activiteiten

    Geen nieuwe activiteiten