Column Tonko Ufkes, column, goed lek

Gepubliceerd op 4 augustus 2015 | door Webloug

0

‘Mien dialect’ column van Tonko Ufkes

Mien dialect

t Is mor één van e veule veurdelen van traauwd weden met n Duutse vraauw; de Duutse meziek die geregeld deur t huus gaalmt. Voak is t ‘klassieke’ popmeziek uut e joaren 80, zo as: BAP, Herbert Grönemeyer of Ina Deter. Sums is t zingen echt en klinkt dan uut Maria’s waarkkoamer of uut e badkoamer.
En ok juust op dit mement komt n prachtege, volle alt boven t spatwotter van e does uut en heur ik over 99 luchtballonnen die onderweegs bennen noar de horizon.
Stil goa k bij de deur stoan, want n aander lied van Nena begunt en k zoem n beetje met: ‘irgendwie, irgendwo, irgendwann’ tot ons tekst niet meer geliek lopt.
Noa n tiedje, as Maria ien heur badjas deur huus scharrelt, vroag ik t noa en bliekt dat zij ienderdoad n aander versie zong as ik. ‘Der zitten stukjes Engels ien’, zeit ze ‘en dat gijt van: “Wrap your fingers ‘round my neck, you don’t speak my dialect, but our images reflect.”
t Wordt me veurzongen met n zaacht-duuts accent, met n volle alt-stem en ok nog es ien n badjas.
Zomor schut me ons Ede Staal ien t zin die over de verschillende dialecten bromde dat t niks uutmoakt, want ”bakker bakt toch brood of stoet”. Hij har geliek, staarker nog: Engels met n zaacht-duuts accent past me lieke goed as mien dialect.
‘Kinst dat nog es zingen, dat van die vingers en zo?’ vroag ik doarom.
‘Best,’ heur ik ‘en doarnoa doen we t soamen.’

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

elf + 5 =

Terug naar boven ↑
  • Literatuur activiteiten

    Geen nieuwe activiteiten