Muziek Henk Scholte, Twij deuntjes veur ain cent,

Gepubliceerd op 27 januari 2015 | door Jan Glas

0

MC Henk en Ingewikkeld presenteren Twij Rapjes veur ain cent!

Woensdagoavend goan we ais aans as aans mit Rik Baptist van Wat Aans wat daiper in op de woddels van de rap en de hiphop. In d’oflopen joaren zain we aal meer nije meziekstijlen in t Grunnegers en omdat we bie de tied blieven mouten is der ook aal meer ruumte veur aal dij nije wegen in de meziek.

De Bende van Baflo Bill (alias; Pë Daalemmer & Rooie Rinus) muiken 25 joar leden veur de poelegrap mit Eppo Bos al n aigentiedse uutstappie mit n vörm van Rap en dat gaait zo in de tied deur richten Kraantje Papppie. Sunt dij tied het t in dij meziekrichten mit bievubbeld de Bond tegen Harries en Olaf Vos mit ‘Dou de loop’ in onze kontraainen nait stille stoan. Hip Hop en Rap, grode stadsmeziek via Amerikoa noar ons pladdelaand, dat har we toudestieds nait bedenken kìnd. Rik stukt t aan d’haand van zien aigen meziek van Wat Aans, mit as nijste lootje ‘Mien Poedie’, veur ons uut. Hai het ook n stel veurbeelden mit onder aander: The Notorious B.I.G. mit ’Juicy’ en Eminem mit ‘The Real Slim Shady’. Op kloare, heldere wieze vertelt e ons, over hou dizze meziek aiglieks in nkaander stekt. Hai let doar bie ook nait onverlet dat de Grunneger toal zuk aiglieks, in tegenstellen van t Hooghoalemmerdieks, haile best derveur laint om t as n smui lopende woordenstroom in n up tempo beat uut te droagen. En t spannende doarbie is dat Amerikoanse slang van Nij Jork en ons Grunnegers din bie zetten kwa klank overainkomsteg noadloos in nkaander overgaait. t Blift dus nait bie wat ik die zeg, mor luuster ais wieder as dien neuze laank is. In t lest komt din ook wel ais bie t luustern de vroage of t Grunnegers of Engels is. Verder besteden we ook aandacht aan de nije ‘Schok’ van Erwin de Vries, dizz’ keer in soamensproak mit Rapper Roberto Tan over d’eerdbevens en aanstoande uutverkoop van Grunnen. De Westerketaaierder laidjeskirrel Gert Sennema mit zien Westkantstad komt dizze week ook weer mit noagelnije laidjes veurbie. Zo zain je mor weer, bie ons blift t aaltied keur en wie vroagen der mit twij deuntjes veur n cent sikkom niks meer veur.

Elke waarkdag van 18:00 – 19:00 uur. Bekiek HIER de Speulliest van (week 4).

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

11 + zestien =

Terug naar boven ↑
  • Muziek activiteiten

    Geen nieuwe activiteiten