Column Fieke Gosselaar, column

Gepubliceerd op 16 januari 2016 | door Webloug

0

‘Man allinneg’ column van Fieke Gosselaar

Man allinneg

Dou ik boeten langs de roeten van traain luip zag ik al n leeg plekje veur miezulf, zodat ik traain binnenkwam en doar direct hin snelde, veurdat aine eerder was. t Is altied n stoulendaans. Links de klapstoultjes woar alle klapfietsen tegenaan stoan. Rechts zag ik nog vlug n man van end vatteg, begun viefteg dij haildaal onderoetzakt zat bie de vaaier lege stoulen. Rest van traain binnen t twij stoulen in n riege, allinneg aan t begun stoan vaaier stoulen as n setje bie n ander. Doar zat hai onderzoetzakt en was hai bezeg mit zien mobieltje. Oet ervoaring wait ik dat dij vaaier stoulen der misschain oetzain asof der veul plek is, mor mainsttied stroomt t ook doar vol en zitst oetindelk tussen zes aandere knijen in.
Ondertussen was t mie lukt om op tied mien stee te vinden en traain ree weg. Boeten was t al duuster, zodat t gain zin haar om noar boeten te kieken. Wie waren t ainegste licht dat deur t landschap schoot van dörp noar dörp. Noast mie zat n student wat veur zoch oet te stoaren en ik viel langzoam in sloap. Inains haar ik deur dat mien mond openston, zodat ik weer wakker wer en hom dichtdee.
Wie kwamen Stad binnenrieden en minsen begonnen zoch te bewegen, wat in heur tazzen te rommeln of op te baargen. Ik was wat troag, zodat alle minsen al in t gaangpad kloarstonden en ik even wachten mos. Dou zag ik de man weer van end vatteg, begun viefteg en nog steeds was hai de ainegste van dij vaaier stoulen. Misschain waren aandere zes knijen al opstapt, mor dat dee der nait tou. Hai ston doar mit zien gebraaide mutske op, n toedeltje der bovenop. Wel het dij braaid? Zien net te körte jaze, zien trui deronder mit n ploatje derop. Ik kon net nait zain wat veur ploatje, mor ik denk n teddybeer. Zien schounen waren sportschounen mit panterprint of n luipaardprint. Hai pakte zien leutje vouwfietsje en ik was sneller as hom traain weer oet.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

een + twaalf =

Terug naar boven ↑
  • Literatuur activiteiten

    Geen nieuwe activiteiten