Literatuur

Gepubliceerd op 15 januari 2013 | door Webloug

0

Literaire Pries van Stichting t Grunneger Bouk veur Nina Werkman

De Literaire Pries 2009-2011 van Stichting t Grunneger Bouk is toukend aan dichteres Nina Werkman oet Stad. Pries, n oorkonde en n geldbedrag, wordt 22 feberwoarie oetlangd ien de Groninger Archieven ien Stad.

De jury motiveert heur keuze ien t juryrapport as volgt: De poëzie van Nina Werkman is staark verankerd ien femilie en verleden. Zai onderzuikt ien heur gedichten de sporen hiervan ien t heden; familie-aarvenizzen dij ain mit hom mitdragt. Hou de sporen deurwaarken ien leven en laifde van de volwazzene. Ien n gedicht over n moekepoes wordt beschreven hou n last van moeke op dochter deurgeven wordt. ‘Wat west het en wat bleven is, dat weegt tegen t graauwlicht van de joaren op’ schrift ze ien t gedicht ‘Tiedmesien’ oet de bundel Wizzelbörg. Der wordt op schaarp schreven, elk woord wordt zörgvuldeg op zien stee metseld tot de compacte, gedetailleerde baauwwaarkjes dij heur gedichten binnen. Der is t besef n vrumde te wezen maank bekend vòlk. n Verlangen noar laifde en gebörgenhaid dat dicht tegen wènst aankropt, wènst sums noar wat ter altied mist het. De onrust van de laifde, en de laifdes dij nait wezen konden. Veur Nina Werkman is poëzie n menaaier om vat op t leven te kriegen. Ien de gedichten over de natuur is der harmonie en rust, de toen dij wél noar aigen ienzicht, mit waiden, snuien en poten, te sturen is. Ze zet de toal volledeg noar heur aigen haand ien n haile aigenzinnege, krachtege stijl.’

Werkman schrift poëzie ien t Grunnegs en ien t Nederlands, ze het al verschaaiden priezen kregen veur heur waark: De Dunya Poëzieprijs 2001, de Apollo Poëzieprijs 2003 en de Jan Boer Poëzieprijs 2005. Ien 2011 won Werkman de Duutse Freudenthal-pries en heur Nederlandstoalege debuutbundel ‘Antidata’ was nomineerd veur de C. Buddingh’-prijs ien 2010. De Grunnegstoalege gedichten van Werkman binnen geregeld te lezen ien tiedschrift Krödde. Jury van de Literaire Pries beston oet: Jan Groenbroek, hoofdredakteur van Toal en Taiken, Luuk Houwing, bestuurslid van Stichting t Grunneger Bouk en Jan Glas, hoofdredakteur van Krödde.

(foto: Jan Glas)

Tags: , ,



Reacties zijn gesloten

Terug naar boven ↑
  • Literatuur activiteiten

    Geen nieuwe activiteiten