Column Chris Kiel, column

Gepubliceerd op 11 april 2016 | door Webloug

0

‘Linkervout noar beneden (Grunnegs is overal)’ column van Chris Kiel

Linkervout noar beneden (Grunnegs is overal)

Ainglieks har k de smoor in.
Portugal.
Mit t vlaigmesien en ook nog van 8 tot 20 meert. Dus: weg Dag van de Grunneger toal.
Hou kwam ze op t idee, mien vraauw. Mor ze har n operoatsie achter de rugge en dou t aal zo kold bleef, wol ze noar de waarmte. En wel bin ik den om mien zin (thoesblieven) deur te zetten.
Ain lokkertje was der ook veur mie bie: noa acht doage sightseeën in t mooie weer van de Algarve n poar doage noar Lissabon: Camoes (binnenkört de romans van Slauerhoff nog es weer lezen) en Pessoa (ik stoa mit hom – hai in brons vanzulf – op foto veur zien stamkroug!). En, ook bie sommege Portugezen nog populairder: mien klaaindochtertje van anderhaalf joar. Stoa k ook mit op foto! (Mien zeun en schoondochter har ze bie zuk.)
Dus heb ik dat vlaigmesien (woar je nait mit raaizen mor verploatst worden, of je n ding binnen) noar Faro mor veur laif nomen en keek ik 9 meert s mörgens vanof t terras van t appartement in Albufeira oet over de blaauwe Atlantico.
Dat blaauw was mooi, mor mit n lege moage verveelt t gaauw. En wie warren loat aankommen, d’oavend derveur mit t huurautootje, harren dus niks meer veur t mörgeneten inkopen kend.
Gelukkeg was der tegenover ons n restaurantje open.
Breakfast vlakbie. Veur n habbekrats. En dizze Portugees serveerde t in t Nederlands. Mit n Grunneger accent: hai har tien joar n vriendin oet Stad had, nog veur de komst van de Euro. t Was nou over, mor hai har aal nog wenst van Stad en de Martinitoren, meer as van heur.
Ook Drie Gezusters en Hoornseplas was e nog nait vergeten. Warffum kon e nait. Mor “Hoetoezen” herinnerd’e zuk nog wel.
En dou t fonkelnije Corsaatje even loater nait starten wol en t Portugese instructieboukje mie ook nait wieder huilp, was hai de redder in nood.
‘Linkervout noar beneden,’ zee e. Har e in Grunnen leerd, in n huurauto.
En inderdoad, dou k koppeling intrapde, startde t autootje onmiddelk!

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

vier − drie =

Terug naar boven ↑
  • Literatuur activiteiten

    Geen nieuwe activiteiten